Ulttyq parkterdegi týrıstik ınfraqurylym qurylysy baqylaýǵa alyndy
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaevtyń tóraǵalyǵymen Memlekettik ulttyq tabıǵı parkter men rezervattar aýmaǵynda ekologııalyq týrızmdi damytý máseleleri boıynsha keńes ótti. Búl týraly Úkimettiń baspasóz qyzmeti habarlady.
Keńeske Ekologııa jáne tabıǵı resýrstar mınıstrligi men Týrızm jáne sport mınıstrliginiń basshylyǵy qatysty.
Keńes barysynda ekologııalyq týrızmdi damytýǵa baǵyttalǵan ınvestıtsııalyq jobalardyń áleýetti pýly, sondaı-aq qajetti týrıstik ınfraqurylymdy qalyptastyrý máseleleri qaraldy. Vızıt-ortalyqtar men ornalastyrý nysandaryn salý kezinde jobalyq-smetalyq qujattamany ýaqtyly ázirleý jáne qurylys-montaj jumystarynyń kestesin saqtaý máselelerine erekshe nazar aýdaryldy.
Premer-mınıstrdiń birinshi orynbasary ınvestorlar tarapynan qabyldanǵan mindettemelerdiń ýaqtyly oryndalýyn qamtamasyz etý qajettigin atap ótti. Sonymen qatar, Aqmola, Almaty, Pavlodar, Túrkistan, Qaraǵandy, Shyǵys Qazaqstan, Jetisý, Abaı oblystary men Almaty qalasynyń ákimdikteri jergilikti atqarýshy organdar retinde atalǵan jobalardyń júzege asyrylýyna kepil bolyp, olardy júzege asyrý barysynda jan-jaqty qoldaý kórsetýi tıis ekeni erekshe atap ótildi.
Ekologııalyq týrızmdi damytý óńirlerdiń týrıstik tartymdylyǵyn edáýir arttyrýǵa, jergilikti turǵyndar úshin jańa jumys oryndaryn ashýǵa, sondaı-aq rekreatsııalyq júkteme men tabıǵı keshenderdi qorǵaý arasyndaǵy tepe-teńdikti qamtamasyz etýge múmkindik beredi dep kútilýde.
Keńes qorytyndysy boıynsha jobalardy iske asyrýdy jedeldetý, qurylys jumystarynyń sapasy men merzimderine baqylaýdy qamtamasyz etý, sondaı-aq erekshe qorǵalatyn tabıǵı aýmaqtardaǵy jumystardyń barysyna turaqty monıtorıng júrgizý jóninde naqty tapsyrmalar berildi.
Aıta ketelik Nurlybek Nálibaev ExxonMobil kompanııasymen strategııalyq munaı gaz jobalaryn damytýdy talqylaǵan edi.
