Ulttyq parkter men rezervattarda órtke qarsy is-shara mardymsyz júrip jatyr – Bektenov
ASTANA. KAZINFORM – Úkimet basshysy Oljas Bektenov elimizde otalǵan aǵashtardy qaıta óńdeýge arnalǵan joǵary shıkizat bazasy bola tura, aǵashtardyń otynǵa aınalatynyn nemese satylyp ketetinin aıtty.
«Ormandy zańsyz kesý jáne órtten qorǵaý sharalaryn qabyldaý qajet. Buǵan deıin ulttyq parkter men rezervattarda órtke qarsy is-sharalar mardymsyz júrgizilip keldi. Ótken jyldary bolǵan alapat órtter anyq kórsetti. Ormandy qorǵaý uıymdary oǵan daıyn bolmaı shyqty. Qazir orman sharýashylyqtaryn, saıabaqtar men rezervattardy órtke qarsy arnaıy júıelermen, tehnıkamen jáne jabdyqtarmen qamtamasyz etý boıynsha aýqymdy jumys qolǵa alyndy. Mysaly, Býrabaı ulttyq parkinde ornatylǵan erte habardar etý júıesiniń arqasynda orman órtteriniń ortasha aýdany 50 esege qysqardy», - dedi Oljas Bektenov Úkimet otyrysynda.
Sondaı-aq Premer-Mınıstr ormandarda sanıtarlyq talaptardy saqtap, aǵashtardy zııankesterden qorǵaý jumysyn jedeldetý kerektigin eske saldy.
«Bul jerde órtengen nemese aýrýǵa shaldyqqan aǵashtar týraly aıtyp otyrmyz. Biz osyndaı zaqym kelgen jalpy aýmaqtyń tek 1%-yn ǵana kádege jaratamyz. Al, elimizde otalǵan aǵashtardy qaıta óńdeýge arnalǵan joǵary shıkizat bazasy bola tura, olar otynǵa aınalady nemese satylyp, izim-ǵaıym joq bolyp ketedi. Sondyqtan osy salaǵa áleýetti ınvestorlardy tartý jumysyn kúsheıtý qajet. Jalpy, orman qoryn ulǵaıtý jumysynda qatań baqylaý men tıisti úılestirýdi qamtamasyz etý mańyzdy», - deıdi ol.
