Ulttyq paralımpıada quramasynyń músheleri Qazaqstannyń sheksiz múmkindikterin kórsetedi – Prezıdent
ASTANA. KAZINFORM – Qasym-Jomart Toqaev búginde memleket tarapynan paralımpıada salasyna jan-jaqty qoldaý kórsetilip jatqanyn aıtty. Bul týraly Aqordanyń baspasóz qyzmeti habarlady.
– Byltyr elimizde 4 zamanaýı ınklıýzıvti sport kesheni jumys isteı bastady. Aldaǵy ýaqytta osyndaı ortalyqtar árbir aımaqta kóbirek ashylýy kerek. Bizdiń demeýshiler osy óte mańyzdy jumystan tys qalmaýy qajet dep oılaımyn. Jalpy, memleket paralımpıada qozǵalysyn qoldaýǵa aıryqsha mán beredi, bul baǵytty qarjylandyrý kólemi de ulǵaıdy. Parasportshylarymyzdyń ójet minezi men muqalmas jigeri – kópke úlgi, óskeleń urpaqqa ónege. Ulttyq paralımpıada quramasynyń ár múshesi Qazaqstannyń sheksiz múmkindikter eli ekenin álemge áıgiledi. Osyǵan oraı, men sizderdi joǵary memlekettik nagradamen marapattaý týraly Jarlyqqa qol qoıdym. Barshańyzǵa qutty bolsyn! Amandyq, tabys tileımin, - dedi Prezıdent.
Memleket basshysy HIV Qysqy Paralımpıada oıyndaryndaǵy (Italııa) joǵary sporttyq jetistikteri úshin Erbol Hamıtovty III dárejeli «Barys» ordenimen marapattady.
Týrızm jáne sport mınıstrligine qarasty Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń jattyqtyrýshylary Vasılıı Kolomıets pen Anton Jdanovıchke «Parasat» ordeni, Soltústik Qazaqstan oblysyndaǵy «Úmit» múmkindikteri shekteýli tulǵalarǵa arnalǵan sport klýbynyń jattyqtyrýshysy Aslan Toqbaevqa «Qurmet» ordeni tabystaldy.
Buǵan deıin Prezıdent HІV Qysqy Paralımpıada oıyndarynyń chempıony Erbol Hamıtovty marapattaǵanyn jazǵan edik.
