Ulttyq panteon aýmaǵyna kimder jerlenedi: Erejege ózgertý engizilmek
ASTANA. KAZINFORM – Ashyq normatıvtik-quqyqtyq aktiler portalynda Ulttyq panteon týraly erejege ózgertý engizýdi kózdeıtin qujat jarııalandy.
Erejege engiziletin ózgertýlerge sáıkes, panteon aýmaǵyna jerlenetin tulǵalar tiziminen Prezıdent otbasynyń músheleri, Memlekettik hatshylar, Konstıtýtsııalyq Keńes tóraǵasy, «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev» ordenimen marapattalǵan azamattar alynyp tastalmaq. Orden ıeleri «Qazaqstan Respýblıkasynyń Tuńǵysh Prezıdenti – Elbasy týraly» Qazaqstan Respýblıkasy Konstıtýtsııalyq zańynyń kúshi joıylýyna baılanysty panteon aýmaǵynda jerlenbeıdi.
Sondaı-aq panteon aýmaǵynda memorıaldyq ǵımarat, «Estelik qabyrǵasy» monýmenti bar estelik mýzeıi (XH-XXІ ǵasyrlar) bolady.
«Qaıtys bolǵan (qaza tapqan) mynadaı adamdar Panteon aýmaǵynda jerlenedi: Qazaqstan Respýblıkasynyń Prezıdentteri; Qazaqstan Respýblıkasynyń Premer-Mınıstrleri jáne olardyń orynbasarlary, Qazaqstan Respýblıkasy Parlamenti palatalarynyń tóraǵalary jáne olardyń orynbasarlary, Qazaqstan Respýblıkasynyń memlekettik keńesshileri, Qazaqstan Respýblıkasy Prezıdenti Ákimshiliginiń basshylary, Qazaqstan Respýblıkasy Konstıtýtsııalyq Sotynyń, Qazaqstan Respýblıkasy Joǵarǵy Sotynyń jáne Qazaqstan Respýblıkasy Ulttyq bankiniń tóraǵalary; mınıstrler, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdardyń basshylary, oblystardyń, respýblıkalyq mańyzy bar qalalardyń, astananyń ákimderi; «Halyq qaharmany», «Qazaqstannyń Eńbek Eri» ataqtaryna ıe bolǵan adamdar; «Altyn qyran», «Otan», «úsh dárejeli «Eńbek Dańqy» ordenderimen marapattalǵan azamattar; «Keńes Odaǵynyń Batyry», «Sotsıalıstik Eńbek Eri» ataqtaryna ıe bolǵan azamattar; «Qazaqstannyń ǵaryshker-ushqyshy» qurmetti ataǵyna ıe bolǵan azamattar; Qazaqstan Respýblıkasy Prezıdentiniń erekshe sheshimi boıynsha basqa da azamattar. Panteonda jerleýge jatatyn adamdarmen olardyń qaıtys bolǵan (qaza tapqan) jubaılaryn jerleýge bolady», - delingen jańa redaktsııadaǵy erejede.
