Ulttyq ortalyq mýzeıde «Altyn Orda» jańa kórme zaly ashylady
ASTANA. KAZINFORM – Aıda Balaeva Qazaqstan Respýblıkasynyń Ulttyq ortalyq mýzeıindegi «Altyn Orda» jańa kórme zalymen tanysty.
Ekspozıtsııa qazaq memlekettiliginiń bastaýy bolǵan tarıhı mańyzdy kezeńderdiń birine arnalǵan.
Ekskýrsııa barysynda Premer-mınıstrdiń orynbasary – Mádenıet jáne aqparat mınıstri mýzeı ekspozıtsııalaryn uıymdastyrýdaǵy tereń ári ǵylymǵa negizdelgen tásilderdi atap ótip, Altyn Orda murasyn keler urpaqqa keńinen nasıhattaýdyń mán-mańyzyna toqtaldy.
Jańa zal ashýdaǵy basty maqsat – kópshilikti XIII–XIV ǵasyrlardaǵy Altyn Ordanyń tarıhymen, mádenıetimen tanystyrý, onyń qazaq memlekettiliginiń bastaýy retindegi rólin kórsetý jáne qoǵamnyń tarıhı sanasyn qalyptastyrý.
Kórmede mýzeı qorynan alynǵan 200-ge jýyq jádiger usynylǵan. Qalalyq mádenıet bólimine turmystyq buıymdar, zergerlik áshekeıler, Almaty oblysy Sheńgeldi aýyly mańynan tabylǵan Shaǵataı áýleti aqsúıekteriniń saltanatty kıimindegi jibek matalardyń qıyndysy qoıylǵan.
Áskerı óner bóliminde qarý-jaraq elementteri kórsetilgen. Memlekettik qurylymǵa arnalǵan bólimde Altyn Ordanyń basqarý júıesi, bıleýshiler genealogııasy jáne Qazaq handyǵymen tarıhı baılanysy baıandalady.
Aıta ketelik Aqtóbede oblystyq mýzeı eksponattarynyń 28% ǵana tsıfrlyq formatqa kóshirildi.