Ulttyq operator atyn jamylǵan alaıaqtar astanalyqtyń 20 mln teńgesin alyp qoıdy
ASTANA. KAZINFORM – Alaıaqtar ózderin ulttyq baılanys operatorynyń qyzmetkeri retinde tanystyryp, azamattardyń aqshasyn jymqyryp otyr.
Astana qalasynyń «Saraıshyq» aýdanynda asa iri mólsherde jasalǵan alaıaqtyq faktisi tirkeldi.
Aldyn ala málimetterge sáıkes, bıyl naýryz aıynda belgisiz tulǵa ózin ulttyq baılanys operatory kompanııasynyń qyzmetkeri retinde tanystyryp, jábirlenýshige qońyraý shalyp, qosymsha telearnalardy qosýǵa 30% jeńildik bar ekenin habarlaǵan.
Telefon arqyly sóılesý barysynda alaıaq jábirlenýshini túrli áreketterdi oryndaýǵa kóndirip, onyń uıaly telefonyna qol jetkizgen.
Nátıjesinde jábirlenýshiniń uıaly telefony ýaqytsha buǵattalyp, onyń depozıttik shotynan 20 mln teńge kólemindegi aqsha qarajaty zańsyz ıemdenilgen.
Atalǵan fakti boıynsha Qylmystyq kodeksiniń 190-baby 4-bóligimen (alaıaqtyq) sotqa deıingi tergep-tekserý bastalyp, tergeý amaldary júrgizilýde.
Astana qalasynyń prokýratýrasy azamattardy saq bolýǵa, beıtanys adamdardyń telefon arqyly bergen nusqaýlaryn oryndamaýǵa, sondaı-aq qupııa kodtardy, bank kartalarynyń derekterin jáne jeke málimetterdi úshinshi tulǵalarǵa bermeýge shaqyrady.
Aıta ketelik alaıaqtar halyqty sotqa qatysý týraly jalǵan habarlama arqyly aldaı bastaǵany týraly jazǵan edik.
