Ulttyq onkologııa ortalyǵy súıek kemigin transplantattaý sanyn jylyna 180-ge deıin jetkizbek

ASTANA. KAZINFORM — Bıyl Ulttyq ǵylymı onkologııa ortalyǵynda qan aýrýlaryna shaldyqqan 1,4 myńǵa jýyq patsıent em qabyldady. Osy kezeńde 60 súıek kemigin transplantattaý otasy jasalyp, taǵy 45 eresek patsıent daıyndyq satysynda tur.

Ortalyqta qan júıesi aýrýlary bar naýqastarǵa halyqaralyq standarttarǵa saı keshendi kómek kórsetiledi. Oǵan boljamdyq qaýipterdi anyqtaý, joǵary dozaly jáne retsıdıvke qarsy hımıoterapııa, sondaı-aq gemopoezdik diń jasýshalaryn transplantattaý kiredi.

«Ortalyq qyzmetiniń 15 jylynda súıek kemigin transplantattaýdyń barlyq túrleri – aýtologııalyq, allogendik týystyq, allogendik týystyq emes jáne gaploıdenttik ádister engizildi. Osy ýaqyt ishinde 800-ge jýyq operatsııa jasaldy. 2025 jyly “taza” úı-jaılar blogyndaǵy tósek sanyn 15-ten 21-ge deıin arttyrý kózdelip otyr. Bul – halyqaralyq eń tómengi standart. Osylaısha jylyna 180 operatsııa jasaýǵa múmkindik týady», – dedi ortalyqtyń basshysy, QR Densaýlyq saqtaý mınıstrliginiń shtattan tys bas gematology, qaýymdastyrylǵan professor Vadım Kemaıkın baspasóz týry barysynda.

Aıta keteıik, Ulttyq ǵylymı onkologııa ortalyǵy – eresek patsıentterge súıek kemigin transplantattaý júrgizetin eldegi jalǵyz medıtsınalyq mekeme. Qan júıesiniń qaterli aýrýlaryna shaldyqqan patsıentterdiń ómir súrý uzaqtyǵyn arttyrýǵa zamanaýı hımıoterapııa hattamalary, jańa dáriler jáne transplantattaý kórsetkishterin keńeıtý múmkindik berip otyr.

Sonymen qatar ortalyqtyń uıymdastyrý-ádistemelik bólimi aımaqtardaǵy onkogematologııalyq naýqastarǵa ádistemelik jáne medıtsınalyq qoldaý kórsetedi. Bul zamanaýı emdeý tásilderin engizýge, emdeý barysyna monıtorıng júrgizýge, onyń tıimdiligin baǵalaýǵa jáne óńirlik mekemelermen sabaqtastyq ornatýǵa sep bolady.

Donor izdeý jumysy aldymen patsıenttiń týystary arasynan bastalady. Eger úılesimdi adam tabylmasa, 2011 jyldan bastap Transfýzıologııa ǵylymı-óndiristik ortalyǵy bazasynda jumys isteıtin Súıek kemigi donorlarynyń ulttyq tirkelimi qoldanylady.

Qazirgi tańda tirkelimde 13 myńnan astam áleýetti donor bar. Osy bazanyń kómegimen, sonyń ishinde Reseı men Italııadan kelgen patsıentterge de 19 týystyq emes transplantattaý otasy jasaldy. 2024 jyly alǵash ret HLA-tıpteý boıynsha tolyq sáıkes keletin donor Qazaqstannan tabylyp, ol Italııa azamatyna kómektesti.

Mamandardyń aıtýynsha, 18 ben 45 jas aralyǵyndaǵy jáne salmaǵy 50 keliden asatyn kez kelgen saý adam donor bola alady. Aferez ádisimen alynatyn diń jasýshalary qaýipsiz, aýyrtpalyqsyz jáne adam densaýlyǵyna zııan keltirmeıdi.

Búginde Qazaqstanda onkogematologııalyq dertke shaldyqqan 13 myńnan astam adam esepte tur. Jyl saıyn 2,5 myńǵa jýyq jańa jaǵdaı tirkeledi. Súıek kemigin transplantattaý – aýyr qan aýrýlaryn emdeýdiń eń tıimdi ádisteriniń biri, al bul baǵyttyń damýy elimizde adam ómirin saqtaýdyń basty tetigine aınalyp otyr.

Aıta keteıik, Almatyda birden 24 balaǵa ota jasaldy.