Ulttyq óner mýzeıinde Tretıakov galereıasynyń kórmesi ashylady
ASTANA. KAZINFORM – Mádenıet jáne aqparat mınıstri Halyqaralyq birikken mádenıetter forýmyna qatysty.
Qazaqstan Respýblıkasynyń Mádenıet jáne aqparat mınıstri Arman Qyryqbaev Sankt-Peterbýrgte ótken XII Halyqaralyq birikken mádenıetter forýmyna qatysty. Forýmǵa sheteldik 43 resmı delegatsııa jınaldy. Sonyń 18-ine mádenıet mınıstrleri jetekshilik etti.
Forým aıasynda Arman Qyryqbaev Reseı Federatsııasynyń Mádenıet mınıstri Olga Lıýbımovamen kezdesti.
Kezdesý basynda Olga Lıýbımova Mańǵystaý oblysynda qaza tapqan qazaqstandyq áskerı qyzmetshilerdiń otbasylary men jaqyndaryna kóńil aıtty.
Taraptar Qazaqstan men Reseıdiń mádenıet salasyndaǵy yntymaqtastyǵyn odan ári damytý jóninde pikir almasty. Atap aıtqanda, Qazaqstan Respýblıkasy men Reseı Federatsııasy arasyndaǵy mádenı-gýmanıtarlyq yntymaqtastyq jónindegi Kishi komıssııanyń jumysy men birlesken jobalardy júzege asyrý máselelerine toqtaldy. Kishi komıssııanyń besinshi otyrysyn 2027 jyldyń birinshi jartysynda Astanada ótkizý josparlanyp otyr.
Aldaǵy birlesken mádenı jobalar da talqylandy. 8 qazanda Ábilhan Qasteev atyndaǵy Qazaqstan Respýblıkasynyń Ulttyq óner mýzeıinde «Nasledıe epohı. Iskýsstvo HH veka ız sobranııa Gosýdarstvennoı Tretıakovskoı galereı» kórmesi ashylady. Kórmege 30 týyndy qoıylady. Sondaı-aq taraptar Qazaqstan Respýblıkasynyń Ulttyq mýzeıinde «Ermıtaj kúnderi» jobasyn ótkizý jaıyn qarastyrdy.
Qazaqstan Respýblıkasynyń Prezıdenti Qasym-Jomart Toqaevtyń tapsyrmasymen Arman Qyryqbaev Olga Lıýbımovaǵa II dárejeli «Dostyq» ordenin tabys etti. Olga Lıýbımova Qazaqstan men Reseı arasyndaǵy dostyq pen yntymaqtastyqty nyǵaıtýǵa, sondaı-aq eki eldiń mádenı baılanystaryn damytýǵa qosqan eleýli úlesi úshin marapattaldy.
Aıta ketelik júlde qory – 10 mln teńge: «Jyldyń 10 úzdik oqyrmany» respýblıkalyq jobasy bastalǵan edi.
