Ulttyq óner mýzeıinde Sahı Romanovtyń 100 jyldyǵyna arnalǵan kórme ashyldy
ASTANA. KAZINFORM - Ábilhan Qasteev atyndaǵy Ulttyq óner mýzeıinde Qazaqstannyń halyq sýretshisi Sahı Romanovtyń týǵanyna 100 jyl tolýyna arnalǵan «Dala sımfonııasy» atty kórme ashyldy, dep habarlaıdy QR Mádenıet jáne aqparat mınıstrliginiń baspasóz qyzmeti.
Kórmeniń ashylýymen qatar, qylqalam sheberiniń shyǵarmashylyǵy jaıynda dóńgelek ústel ótti.
Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaeva kórmeniń ashylýyna oraı quttyqtaý hatyn joldady.
Quttyqtaýda Sahı Romanovtyń qazaq beıneleý óneriniń, ulttyq keskindeme men grafıkanyń damýyna súbeli úles qosqany atap ótildi.
-Sahı Romanov – qazaq beıneleý óneriniń kórkemdik órisin keńeıtip, ulttyq keskindeme men grafıkada aıryqsha qoltańba qaldyrǵan dara sýretker. «Dala sımfonııasy» – sýretshiniń baı murasyn jańasha zerdeleýge, shyǵarmashylyq izdenisteriniń aýqymyn saralaýǵa jáne keıingi urpaqqa tanytýǵa múmkindik beretin mańyzdy mádenı oqıǵa dep bilemin, – delingen quttyqtaý hatta.
Ekspozıtsııaǵa mýzeı qoryndaǵy jáne sýretshiniń otbasy saqtaǵan týyndylar qoıylǵan. Olardyń qatarynda «Shopannyń otbasy», «Jer týraly dekret», «Otan aspany aıasynda», «Buǵaýdan bosaý» sekildi shyǵarmalar bar.
Sahı Romanov keskindeme, grafıka jáne kıno salasynda jemisti eńbek etti. 1955 jyly Búkilodaqtyq memlekettik kınematografııa ınstıtýtyn támamdaǵannan keıin «Qazaqfılm» kınostýdııasynda qyzmet atqardy. Ol «Ómir joly», «Aldar kóse», «Án qanaty» jáne «Qulager» fılmderiniń jaryqqa shyǵýyna atsalysty.
1967 jyly Sahı Romanovqa Qazaq KSR-niń eńbek sińirgen óner qaıratkeri, al 1981 jyly Qazaq KSR-niń halyq sýretshisi qurmetti ataqtary berildi. Kórme Sahı Romanovtyń shyǵarmashylyq murasy men ulttyq ónerdiń órkendeýine qosqan eńbegin jan-jaqty tanytady.
Osyǵan deıin habarlaǵanymyzdaı, Ulttyq mýzeıde «Afınadan Astanaǵa deıin» atty taqyrypta halyqaralyq kórme ashyldy.
