Ulttyq olımpıadalyq komıtet Shaıdorovqa Olımpıadaǵa daıyndalýy úshin grant bóldi
ASTANA. KAZINFORM – Qazaqstan ulttyq olımpıadalyq komıteti Halyqaralyq olımpıadalyq komıtettiń bolashaǵy zor sportshylardy qoldaýǵa baǵyttalǵan baǵdarlamalaryn júzege asyrýdy jalǵastyryp jatyr. Osy oraıda mánerlep syrǵanaýshy Mıhaıl Shaıdorovqa qoldaý kórsetildi.
HOK-niń 2025 jylǵa arnalǵan Olımpıadalyq yntymaqtastyq baǵdarlamasy aıasyndaǵy qurlyqtyq grant sheńberinde Qazaqstan UOK Mıhaıl Shaıdorovty 2026 jyly Italııada ótetin Olımpıada oıyndaryna daıyndaý úshin qarjylaı qoldaý kórsetý týraly sheshim qabyldady. Bul grant bir olımpıadalyq maýsymǵa arnalǵan jáne halyqaralyq deńgeıde básekege qabilettilikti arttyrý úshin birneshe sport túri arasynda UOK tarapynan bólinedi.
Nátıjesinde qoldaý mánerlep syrǵanaý, sadaq atý, badmınton jáne baıdarka men kanoede esý komandalaryna baǵyttaldy. Baǵdarlama 2025 jyldan 2028 jylǵa deıingi aralyqty qamtyp, jyldar boıynsha kezekpen qarjylandyrýdy qarastyrady.
Olımpıadalyq yntymaqtastyqtyń arnaıy baǵdarlamasy aımaqtyq, qurlyqtyq jáne álemdik týrnırlerge, sonyń ishinde Olımpıada oıyndaryna qatysýǵa sportshylardy daıyndaýǵa arnalǵan tehnıkalyq jáne qarjylyq kómek kórsetedi. Bul qoldaý tek jattyǵý protsesine, daıyndyq sharalaryna jáne jarystarǵa qatysýǵa baǵyttalǵan. Grant memlekettik qarjy esebinen óteý múmkin emes shyǵyndardy jabýǵa arnalǵan.
Ótken olımpıadalyq maýsymda dál osyndaı grant frıstaıl-akrobatıka boıynsha ulttyq quramaǵa berilgen bolatyn. Bul komanda aıtarlyqtaı nátıjege qol jetkizip, 2025 jylǵy qysqy Azııa oıyndarynda tarıhı altyn medal ıelendi.
Buǵan deıin mánerlep syrǵanaýshy Mıhaıl Shaıdorov álem chempıonatynyń kúmis júldesin jeńip alyp, 2026 jylǵy Olımpıadaǵa joldama alǵanyn jazǵan edik.