Ulttyq Olımpıada komıteti men Qorǵanys mınıstrligi memorandýmǵa qol qoıdy
ASTANA. KAZINFORM – Elordada Qazaqstan Respýblıkasynyń Qorǵanys mınıstrligi men Ulttyq Olımpıada komıteti ózara kelisimge keldi. Bul týraly UOK habarlady.
Qorǵanys mınıstri, sporttyq jáne jaýyngerlik sambodan federatsııanyń prezıdenti, general-polkovnık Rýslan Jaqsylyqov jáne UOK prezıdenti Gennadıı Golovkın ózara yntymaqtastyq jónindegi qujatqa qol qoıdy. Taraptar áskerı qyzmetshiler arasynda olımpıadalyq qozǵalysty qoldaý, sporttyq ınfraqurylymdy jaqsartý jáne armııa sportshylaryn daıyndaý tıimdiligin arttyrý boıynsha birlesip jumys isteýge ýaǵdalasty.
Qorǵanys mınıstri Gennadıı Golovkın syndy tájirıbeli, kásibı sportshynyń UOK prezıdenti laýazymyna taǵaıyndalýy qazaqstandyq sporttyń, onyń ishinde áskerı sporttyń damýyna oń áserin tıgizip jatqanyn atap ótti. Sondaı-aq ol Qorǵanys mınıstrliginiń Sport komıteti men UOK arasyndaǵy kúsh biriktirý áskerı sportshylardyń sheberligin arttyrýǵa yqpal etetinin basa aıtty.
— Qorǵanys mınıstrliginiń Ortalyq sport klýby men Ulttyq Olımpıadalyq komıtet arasyndaǵy áskerı sportshylardy qoldaý boıynsha kúsh biriktirý olardyń sheberligin arttyrýǵa sep bolady. Sebebi bizdiń ortaq maqsatymyz — chempıon tárbıelep, Qazaqstandy tanytý, - dedi Qorǵanys mınıstri.
General-polkovnık Rýslan Jaqsylyqov sondaı-aq jaqyn arada Almaty qalasynda áskerı-sport kolledji ashylatynyn habarlady. Onda tárbıelenýshiler sporttyq, áskerı jáne tehnıkalyq bilim alyp, aýyldyq óńir jastaryna úlken sportta joǵary jetistikterge jetýge múmkindik beriledi.
Qazaqstan Ulttyq Olımpıadalyq komıtetiniń prezıdenti Gennadıı Golovkın Qorǵanys mınıstrliginiń olımpıada sportshylaryn daıyndaýǵa kórsetip jatqan qoldaýyn joǵary baǵalaıtynyn jetkizdi.
— Bizdiń yntymaqtastyǵymyz Qazaqstanda sporttyń odan ári damýyna jáne halyqaralyq arenada sportshylarymyzdyń bedelin arttyrýǵa yqpal etedi. Maqsatymyz ortaq, al birlese áreket etýimiz jemisti bolady dep senemin, - dedi Gennadıı Golovkın.
Aıta keteıik, Qorǵanys mınıstrliginiń Sport komıtetinde 12 olımpıadalyq sport túri damytylyp jatyr. Ortalyq sport klýbynda 131 sportshy jattyǵady. Ótken jyly áskerı qyzmetshiler Olımpıada oıyndaryna 21 joldama jeńip aldy. Olardyń tórteýi Parıjdegi Olımpıadada júldeger atandy.