Ulttyq neırohırýrgııa ortalyǵynda 50 myńnan astam ota jasaldy
ASTANA. KAZINFORM – Premer-mınıstriniń orynbasary Ermek Kósherbaev Ulttyq neırohırýrgııa ortalyǵyna baryp, mekemeniń jumysymen tanysty. Bul týraly Úkimettiń baspasóz qyzmeti habarlady.
Vıtse-premer klınıkalyq bólimshelerdi jáne «Gamma-pyshaq» keshenin aralap kórip, medıtsına qyzmetkerlerimen jáne naýqastarmen kezdesti. Sondaı-aq elimizde joǵary tehnologııaly medıtsınany damytý keleshegi talqylandy.
2008 jyly negizi qalanǵan Ulttyq neırohırýrgııa ortalyǵy — dıagnostıkadan bastap erte ońaltýǵa deıingi neırohırýrgııalyq qyzmettiń tolyq tsıklin usynatyn elimizdegi jalǵyz mamandandyrylǵan mekeme. Ortalyq ozyq tehnologııalardy engizý jáne joǵary sapaly medıtsınalyq kómek kórsetýge múmkindik beretin klınıkalyq, ǵylymı jáne bilim berý qyzmetin biriktiredi.
Ermek Kósherbaev dárigerler men medıtsına qyzmetkerlerine qajyrly eńbegi men joǵary kásibıligi úshin alǵysyn bildirdi, sondaı-aq naýqastardyń ortalyqqa degen senimin jáne medıtsınalyq kómektiń sapasyna bergen oń baǵasyn atap ótti.
— Ulttyq neırohırýrgııa ortalyǵy — bul jaı ǵana klınıka emes, bul bolashaq medıtsınasynyń standarttaryn qalyptastyratyn ǵylymı-tehnologııalyq platforma. Munda birlesip jumys isteıtin, bilikti komanda qyzmet etedi. Osyndaı ujymdar — ulttyq densaýlyq saqtaý júıesiniń tiregi, — dedi vıtse-premer.
Klınıka 160 tósekke eseptelgen, quramynda 6 klınıkalyq jáne 9 paraklınıkalyq bólimshe bar, zamanaýı joǵary tehnologııaly jabdyqtarmen qamtylǵan. Ortalyq ashylǵaly beri 70 myńnan astam naýqasqa em kórsetilip, 50 myńnan astam ota jasaldy. Munda buryn sońdy Qazaqstan men Ortalyq Azııa elderinde qoldanylmaǵan 73 ınnovatsııalyq neırohırýrgııalyq tehnologııa engizilgen. 2021 jyly munda óńirdegi alǵashqy stereotaksıkalyq radıohırýrgııa kesheni — «Gamma-pyshaq» iske qosylyp, búginde 2 myńnan astam ota jasaldy.
«Ulttyq neırohırýrgııa ortalyǵy» AQ basqarma tóraǵasy Serik Aqsholaqov mekemeniń qazirgi jetistikteri men damý baǵyttary týraly baıandady:
— Qazirgi tańda Ortalyq jańa neırohırýrgııalyq tásilderdi engizýdi jáne ǵylymı-bilim berý baǵytyn nyǵaıtýdy jalǵastyryp keledi. Bizdiń maqsatymyz — tek emdeý emes, sonymen qatar otandyq medıtsınanyń ıntellektýaldy negizin qalyptastyrý. Bizde jetkilikti áleýet bar, ony elimizdiń densaýlyq saqtaý júıesi ıgiligine keńinen qoldanýǵa daıynbyz, — dedi basqarma tóraǵasy.
Sapar sońynda Premer-mınıstrdiń orynbasary joǵary tehnologııaly medıtsınany damytýdyń strategııalyq mańyzyn atap ótti:
— Sapaly medıtsınalyq kómekke teń qoljetimdilikti qamtamasyz etý — Memleket basshysynyń tikeleı tapsyrmasy. Elimizdiń azamattary qaı óńirde tursa da, zamanaýı em alýǵa múmkindigi bolýy kerek. Osy Ortalyqtyń tájirıbesin búkil el boıynsha keńinen taratý qajet, — dedi Ermek Kósherbaev.
Ulttyq neırohırýrgııa ortalyǵy — ǵylym, tehnologııa jáne adamı kapıtaldyń tıimdi birigýi medıtsınalyq kómektiń joǵary sapasyna qol jetkizýge múmkindik beretinin kórsetetin jarqyn mysal. Mundaı ortalyqtardy damytý — densaýlyq saqtaý salasyndaǵy memlekettik saıasattyń mańyzdy baǵyty. Úkimet aldaǵy ýaqytta da ınnovatsııalyq sheshimderdi engizýdi jáne tabysty tájirıbelerdi keńeıtýdi qoldaıdy, bul óz kezeginde árbir azamattyń turǵylyqty óńirine qaramastan aldyńǵy qatarly medıtsınalyq qyzmetterge qol jetkizýin qamtamasyz etedi.
Aıta ketelik elimizde balalar arasyndaǵy qaterli isikterden aman qalý kórsetkishi 70%-dan asady.