Ulttyq naqyshtaǵy kıim men áshekeı satatyn dúkenge ınvestıtsııa salǵan aqtóblikter aldanyp qaldy
AQTÓBE. KAZINFORM — Qazirgi kezde 8 adam 72 mln teńgesinen aıyrylyp otyr. Al kúdikti úıqamaqta.
Aqtóbe oblystyq polıtsııa departamenti taǵy bir alaıaqtyq is boıynsha tergeýdi bastady. «Bórte» brendin damytyp otyrǵan kásipker adamdardy ınvestor bolýǵa shaqyryp, ýáde etken ýaqytta aqshany múlde qaıtarmaı qoıǵan.
— Aqtóbe oblysynyń turǵyndary ulttyq naqyshtaǵy kıimder men áshekeı satatyn dúkenniń qyzmeti týraly Instagram áleýmettik jelisi arqyly bilgen. Dúkenniń áleýmettik jelidegi paraqshasynda brendti damytýǵa jáne ilgeriletýge ınvestıtsııa salý arqyly joǵary tabys tabýǵa bolatyny týraly jarııalanǵan. Keıin dúken ıesi de azamattarmen jeke kezdesip, óz brendine qarjy salýdy usynǵan. Aı saıyn salǵan ınvestıtsııanyń 10 paıyzyn berýge jáne belgili bir ýaqyttan keıin salǵan aqshany keri qaıtarýǵa ýáde etken. Sondaı-aq dúkendegi kez kelgen taýardy syılyq retinde beretinin aıtqan. Tabys tabýdy oınaǵan adamdar óz qarjysyn salǵan. Alaıda ýáde etken tólemdi bermedi, aqsha ıelerine qaıtarylmaǵan. Qazirgi ýaqytta qylmystyq is boıynsha 8 azamat jábirlenýshi dep tanyldy. Keltirilgen materıaldyq shyǵynnyń jalpy somasy 72 mıllıon teńgeden asady, — dep habarlady Aqtóbe oblystyq PD baspasóz qyzmeti.
Tergeý kezinde jábirlenýshi sany artýy múmkin. Bul joly polıtsııa olardy Aqtóbe qalasy polıtsııa basqarmasyna, ıaǵnı, Sáńkibaı batyr dańǵyly 24R mekenjaıy kelip, aryz jazýdy surady. Qazir kúdikti úıqamaqta otyr.
Buǵan deıin habarlaǵanymyzdaı, Aqtóbede týrıstik agenttik basshysy ustaldy. Barlyǵy 70-ten astam adam aldanǵanyn aıtyp, aryz jazdy. Shyǵyn 32 mln teńgeden asady.
