Ulttyq naqyshtaǵy 500 shapan: Jańaarqa sheberleri Qazaqstan rekordtar kitabyna endi
ULYTAÝ KAZINFORM — Ulytaý oblysynyń Jańaarqa aýdany taǵy bir erekshe jetistikpen tanyldy. Qazaqstanda alǵash ret bir aýdannyń tiginshileri óńirge tán ulttyq naqyshtaǵy 500 birdeı shapan tigip, rekordtar kitabyna endi.
Bul ıgi bastamanyń jetekshisi — Qaısar Seıpishov. Onyń aıtýynsha, joba aıasynda tek shapan tigýmen shektelmeı, úlken qaıyrymdylyq is te júzege asqan.
— 4,5 tonna et óńdelip, 22 jylqy men birneshe tý bıeler soıyldy. 500-den asa tabaq et zeket retinde Jezqazǵan qalasyndaǵy 200 tárbıelenýshisi bar balalar úıine, shamamen 300 qart turatyn qarttar úıine, sondaı-aq ońaltý ortalyqtaryna, Ulytaý jáne Qaraǵandy qalalaryndaǵy medreselerge taratyldy. Bul — bir jyldyq as retinde berilgen syı, — deıdi ol.
Sonymen qatar, Jańaarqa aýdanynda 500 otbasyǵa da et úlestirilgen. Jalpy 2,5 tonnaǵa jýyq et turǵyndarǵa jetkizilgen.
Qaısar Seıpishovtiń aıtýynsha, joba ıdeıasy bala kúngi estelikten týǵan.
— Men kishkentaı kezimnen anamnyń qoldan tikken shapandaryn kıip óstim. Sol dástúrdi saqtap, búginde óz otbasym da shapan kıedi. Bir kúni anamnyń shapanynyń úlgisimen 500 birdeı shapan tiksek qalaı bolar eken degen oı keldi. Osylaısha, kógildir tústi, oıý-órnegi men naqyshy birdeı shapandar dúnıege keldi. Bul — Jańaarqanyń brendi desek te bolady, — deıdi ol.
Jobany uıymdastyrýshylardyń biri — Elmıra Erjanova. Onyń aıtýynsha, bul iske barlyǵy 17 tiginshi qatysqan. Olar jalpy myńǵa jýyq shapan tikken. Onyń 500-i rekordtyq joba aıasynda daıyndalyp, 400-ge jýyǵy qarttar úıine syıǵa tartylǵan, al qalǵany kelgen qonaqtarǵa kádesyı retinde berilgen.
Rekordty resmı túrde tirkeý kezinde 600-ge jýyq jańaarqalyq turǵyn kógildir shapandaryn kıip, bir mezette sahnaǵa shyqqan. Bul kórinis — óńirdiń birligin, eńbeksúıgishtigi men dástúrge degen qurmetin aıshyqtady.
Aıta keteıik, jobaǵa qatysqan tiginshilerdiń barlyǵy matany óz qarajattaryna satyp alǵan.
Olardyń eńbegi men yntasy — ulttyq murany dáripteýdiń jáne birliktiń jarqyn úlgisi bolyp otyr.