Ulttyq mýzeıde Qytaıdyń ejelgi qolóner jaýharlary kórmesi ashyldy
ASTANA. KAZINFORM — 22 qazanda Qazaqstan Respýblıkasynyń Ulttyq mýzeıinde «Órkenıet izderi — Qytaıdyń ejelgi qolóner jaýharlary» atty kórme qoǵam nazaryna usynyldy.
Kórme Qazaqstan Respýblıkasynyń Ulttyq mýzeıi men Qytaıdyń Tıantszın mýzeıiniń birlesken uıymdastyrýymen ashyldy.
Іs-sharanyń ashylý rásiminde QR Mádenıet jáne aqparat mınıstrligi Mádenıet komıtetiniń tóraǵasy Erlan Dákenov Mádenıet jáne aqparat mınıstri Aıda Balaevanyń quttyqtaý hatyn oqyp berdi.
Mınıstr óz quttyqtaýynda Qytaı jáne Qazaqstan basshylarynyń qoldaýy men bastamalarynyń arqasynda «Qytaıdaǵy Qazaqstannyń týrızm jyly» jáne «Qazaqstandaǵy Qytaıdyń týrızm jyly» aıasynda birqatar mádenı is-shara ótkizilgenin atap ótti.
Osy jobalar aıasynda eki el arasyndaǵy mádenı jáne gýmanıtarlyq yntymaqtastyq edáýir damyp, ózara túsinistik pen dostyqtyń jańa deńgeıine kóterilgenin jetkizdi.
Sondaı-aq Aıda Balaeva ótken jyly Tıantszın mýzeıinde ótken «Altyn adam jáne dáýletti dala: Qazaqstan tarıhynyń jádigerleri» atty kórmeniń tabysty ótkenin eske alyp, bul jobanyń eki el arasyndaǵy saıası senimge negizdelgen dostyq qatynastyń aıqyn kórinisi bolǵanyn atap ótti.
Mınıstr jańa kórmege tabys tilep, onyń Qazaqstan men Qytaı arasyndaǵy joǵary deńgeıdegi mádenı baılanystardy odan ári nyǵaıtýǵa yqpal etetinine senim bildirdi.
Kórmeniń ashylý rásimine Qytaı Halyq Respýblıkasynyń Qazaqstan Respýblıkasyndaǵy Tótenshe jáne Ókiletti elshisi Han Chýnlın, qoǵam jáne mádenıet qaıratkerleri, sondaı-aq óner súıer qaýym ókilderi — barlyǵy júzge jýyq adam qatysty.
Ekspozıtsııa «Qytaı keramıkasynyń sazy», «Sheberlik ǵajaıyby», «Jibek órnekti Qytaı», «Tıantszınniń kelbeti» atty bólimderden turady.
Kórmege barlyǵy 62 (jıyntyq) jádiger qoıylǵan. Olardyń qatarynda súıek jazbalar, qysh buıymdar, nefrıtten jasalǵan áshekeıler jáne basqa da tarıhı qundylyqtar bar.
«Órkenıet izderi — Qytaıdyń ejelgi qolóner jaýharlary» kórmesi Qytaı sheberleriniń danalyǵy men shyǵarmashylyq qýatyn pash etip qana qoımaı, Qazaqstan halqynyń kórshiles eldiń baı mádenı murasymen jáne kóne órkenıetiniń rýhanı qazynasymen jaqynyraq tanysýyna múmkindik beredi.
Bul shara eki halyq arasyndaǵy dostyq pen mádenı ózara túsinistikti odan ári tereńdetýge baǵyttalǵan mańyzdy mádenı bastama sanalady.
Osydan buryn Ulttyq mýzeıde «Zergerlik kod» halyqaralyq kórmesi ótkenin jazǵan edik.