Ulttyq mýzeı Italııadaǵy restavratsııa ınstıtýtymen áriptestik ornatpaq

ASTANA. KAZINFORM – Ulttyq mýzeı dırektory Berik Ábdiǵalıuly Jibek Joly telearnasyna bergen suhbatynda eldegi restavratsııa isin damytýǵa baǵyttalǵan josparymen bólisti.

- Mádenıet mınıstrliginiń qoldaýymen Italııadaǵy restavratsııa ınstıtýtymen osy salany damytý týraly kelisimshartqa qol qoıý kerek. Osy kúnderi (19 mamyrdan bastap – red.) úshinshi mýzeı kongresin ótkizip otyrmyz. Eki kún boıy eldegi 80-ge jýyq restavratorlardy jınap, restavratsııa máselesin talqylaýǵa múmkindik usyndyq, - dedi ol «Ýáde» baǵdarlamasynda.

Kongress aıasynda Túrkııadan, Reseıden Ázerbaıjannan mamandardy shaqyrtylyp, sheberlik saǵattaryn uıymdastyrylyp otyr.

- Bizdegi mýzeılerdiń bir problemasy – qundy jádigerlerdiń tozýy, solardy qalpyna keltiremiz dep buzyp alýy. Bul - kúrdeli jumys, kez kelgenniń qolynan kele bermeıdi. Kezinde óńirlerden jınalǵan qundy artefaktar asyǵys qabyldanyp ketkenin kórip otyrmyz. Solardy ekspozıtsııalaý máselesin qolǵa alyp jatyrmyz, - deıdi Berik Ábdiǵalıuly.

Sondaı-aq spıker sheteldegi qazaq jádigerleriniń katalogi jasalatynyn málim etti. 

Aıta ketsek, keshe Prezıdent Jarlyǵymen ulttyq mádenıetti damytýǵa jáne nasıhattaýǵa qosqan aıryqsha úlesi, mádenıet salasyndaǵy asa úzdik jetistikteri jáne Qazaqstan Respýblıkasyna sińirgen eńbegi úshin bir top azamat memlekettik nagradalarmen marapattaldy.