Ulttyq múddeniń kepili: jańa Konstıtýtsııanyń irgeli normalarynyń avtory – Prezıdent
ASTANA. KAZINFORM — «Ádiletti ári Progressıvti Qazaqstannyń Halyqtyq Konstıtýtsııasy úshin» jalpyulttyq koalıtsııasynyń músheleri Aqtóbe oblysynyń aktıvimen kezdesti. Іs-shara barysynda Memlekettik keńesshi Erlan Qarın eldiń jańa Ata Zań jobasy qalaı ázirlengeni týraly mańyzdy ári qyzyqty derekterdi aıtty.
Onyń aıtýynsha, Prezıdent tek reformalarǵa bastamashy bolyp qana qoımaı, jańa Konstıtýtsııanyń negizgi erejeleriniń tikeleı avtory boldy.
— Prezıdenttiń memlekettik qundylyqtarǵa degen qasterli ári muqııat kózqarasynyń jarqyn kórinisteriniń biri — mátindermen jumys isteý mádenıeti. Memleket basshysy Qasym-Jomart Kemeluly túrli qujattarmen jumys istegende, óziniń sóıleıtin sózderinde «Egemendik» jáne «Táýelsizdik» uǵymdaryn árdaıym bas árippen jazady, — dep atap ótti Erlan Qarın.
Memlekettik keńesshiniń pikirinshe bul jaı ǵana stılıstıkalyq erekshelik emes, eldiń joǵary basshylyǵy ustanatyn qaǵıdatty ustanym.
— Prezıdenttiń oıynsha, bizdiń de pikirimizshe, bul sózder — qasıetti, qasterli uǵymdar. Ata Zańnyń jańa mátininde de osy ustanym saqtaldy, — dedi ol.
Erlan Qarınniń sózinshe, Prezıdenttiń tájirıbesi mol — ol memlekettik jáne halyqaralyq deńgeıdegi eń joǵary laýazymdarda qyzmet atqardy. Mundaı qyzmetterde árbir sózdiń dáldigi úlken mánge ıe. Sol sebepti de tujyrymdarǵa aıryqsha muqııat qaraıdy.
– Ol uzaq jyldar boıy Parlamentte, Úkimette, Halyqaralyq uıymdarda qyzmet atqardy. Sol sebepti, qujattarmen jumys isteýdiń nıýanstaryn, erekshelikterin jaqsy biledi. Árbir sózdiń salmaǵyn jaqsy túsinedi. Muqııat qaraıdy, — dedi Erlan Qarın.
Onyń aıtýynsha, Qasym-Jomart Toqaev reformalarǵa jalpy basshylyq jasaýmen shektelmeı, jańa Ata Zańnyń árbir erejesin jeke ózi muqııat ázirleýge tikeleı aralasqan. Prezıdenttiń tikeleı bastamasymen Konstıtýtsııaǵa irgeli ózgerister engizildi.
– Memleket basshysy Parlamenttik jáne Konstıtýtsııalyq reformalar aıasynda usynylǵan árbir bastamany jeke ári egjeı-tegjeıli zerdeledi. Sondyqtan jańa Konstıtýtsııadaǵy negizgi ári qaǵıdatty ózgeristerdiń kóbin ol ózi usyndy. Mysaly, jańa Preambýla Prezıdenttiń tujyrymdamalyq tezısteri negizinde ázirlendi. Sol sııaqty jańa Konstıtýtsııadaǵy úlken jańashyldyqtardyń, ásirese qarapaıym azamattardyń múddesin qorǵaıtyn jańa normalardyń avtory da — ózi, — dep atap ótti Memlekettik keńesshi.
Sóz sońynda Erlan Qarın Jańa Konstıtýtsııada Memleket basshysynyń anyq qoltańbasy bar ekenin jetkizdi. Onyń aıtýynsha, Qasym-Jomart Kemelulyn qujattyń negizgi basty avtorlarynyń biri desek te esh qatelespeımiz.
Eske sala keteıik, Prezıdent Jarlyǵymen jańa Konstıtýtsııa jobasy 2026 jylǵy 15 naýryzda ótetin respýblıkalyq referendýmǵa shyǵaryldy. Qujatty talqylaý jarty jylǵa sozylyp, azamattardan, sarapshylardan, saıası partııalar men uıymdardan túsken myńdaǵan usynystar eskerildi.