Ulttyq qus sharýashylyǵy ǵylymı-zertteý ortalyǵy quryla ma — Bektenov jaýaby
ASTANA. KAZINFORM — Sońǵy bes jylda qus sharýashylyǵy salasyndaǵy ǵylymı zertteýlerdi júrgizýge shamamen 540 mln teńge bólindi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
Premer-mınıstrdiń atap ótýinshe, sońǵy bes jylda Úkimet qabyldaǵan sharalar qus sharýashylyǵynda aıtarlyqtaı nátıjelerge qol jetkizýge múmkindik berdi.
— Budan bólek, qazirgi ýaqytta otandyq asyl tuqymdy bazany keńeıtý, reprodýktorlar qurýdy yntalandyrý, asyl tuqymdy materıal satyp alýdy sýbsıdııalaý, ǵylymı zertteýlerdi damytý jáne bilikti kadrlar daıarlaý boıynsha jumystar júrgizilip jatyr. Osylaısha, otandyq ǵylymı áleýetti damytý basym baǵyttardyń biri sanalady. Qazirgi kezde qus sharýashylyǵy salasyndaǵy zertteýler Jáńgir han atyndaǵy Batys Qazaqstan agrarlyq-tehnıkalyq ýnıversıteti bazasynda júrgiziledi, — dedi ol.
Onyń dereginshe, sońǵy bes jylda qus sharýashylyǵy salasyndaǵy ǵylymı zertteýlerdi júrgizýge shamamen 540 mln teńge bólindi.
— Nátıjesinde selektsııalyq ázirlemeler alynyp, qus sharýashylyǵy tehnologııalaryn jetildirý boıynsha usynymdar daıyndaldy. Sondaı-aq qazirgi ýaqytta synaqtan ótip jatqan jabdyqtyń eksperımenttik úlgileri jasaldy. Atap ótý kerek, qus sharýashylyǵy ortalyǵyn qurý boıynsha usynys ózekti, salanyń odan ári damýy otandyq selektsııany ilgeriletý jáne ǵylymı ázirlemelerdi engizýdi qosa alǵanda, ǵylymı zertteýlerge keshendi tásildi zerdeleýdi qajet etedi. Osyǵan baılanysty Aýyl sharýashylyǵy mınıstrligi Ulttyq qus sharýashylyǵy ǵylymı-zertteý ortalyǵyn qurýdyń oryndylyǵyn aıqyndaý úshin jumys tobyn qurdy, — dedi Premer-mınıstr.
Oljas Bektenovtiń aıtýynsha, jumys toby ǵylymı jáne kadrlyq áleýetke, salanyń suranysyna jáne jumys istep turǵan ǵylymı uıymdardyń múmkindikterine taldaý júrgizedi.
— Osy jumystyń qorytyndysy boıynsha basym ǵylymı mindetterdi, uıymdastyrýshylyq jaǵdaılardy jáne qarjylandyrý kózderin eskere otyryp, ortalyqty qurýdyń oryndylyǵy týraly ustanym qalyptastyrylady, — dedi Úkimet basshysy.
Buǵan deıin Quryltaı depýtaty Rábıǵa Toqseıitova Qus sharýashylyǵynyń ulttyq ǵylymı-zertteý ortalyǵyn qurýdy usynǵan edi.
