Ulttyq quryltaıdyń kezekti otyrysyn Kókshetaýda ótkizýdiń ózindik sebepteri bar - professor Sábıt Jámbek
ASTANA. KAZINFORM - Sh.Ýálıhanov atyndaǵy Kókshetaý ýnıversıtetiniń professory Sábıt Jámbek Atyraý oblysynda ótken Ulttyq quryltaıǵa baılanysty pikir bildirdi.
"Jańa Qazaqstan keńistigindegi aıryqsha qolǵa alynǵan sharalardyń biri — Ulttyq Quryltaı ótkizý. El Prezıdentiniń bastamasymen birinshi Quryltaı qasıetti Ulytaý jerinde ótkizildi. Sebebi Ulytaý jeri ejelgi tarıhqa óte baı jer. Qazaq jeriniń kindik ortasy bolǵan osynaý qasıetti mekende qazaq handaryn handyq bılikke otyrǵyzyp, ulyqtaý rásimi ótetin bolǵan. Birinshi Quryltaıda kóterilgen ózekti máseleler men usynystar aqyryndap qoǵamymyzda júzege asa bastady.
Ekinshi Quryltaı da el basshysynyń nusqaýymen qazaq handarynyń astanasy bolǵan qasıetti Túrkistanda ótti. Mundaǵy kóterilgen irgeli máseler de júzege asa bastaǵanyn kóz kórip, qulaq estip otyr. Jańa Qazaqstannyń erekshe sıpaty bolyp tabylatyn, halyqtyq parlament sanalatyn Ulttyq Quryltaı bul joly ejelgi Atyraý jerinde ótip otyr. Osyndaǵy kóne Saraıshyq qalasy Qasym hannyń tusynda Qazaq Ordasynyń astanasy bolǵan. Bul Quryltaıda da eldik eleýli máseleler kóterildi. El Prezıdenti Quryltaıdyń kezekti otyrysyn Kókshetaýda ótkizýdi usyndy. Onyń da ózindik sebepteri bar. Sebebi Kókshetaý án men jyrdyń ordasy ǵana emes, Abylaı han týyn tikken qasıetti Han Ordasy bolǵan meken. Osy jerden qazaqtyń sońǵy hany Kenesary da táýelsizdik úshin atoılap atqa mingen. El Prezıdentiniń bul sheshimin rızashylyqpen quptaımyz", - dedi Sábıt Jámbek,.
