Ulttyq quryltaıdyń aıasynda 2024 jyly atqarylǵan jumystyń qorytyndysy jasaldy
ASTANA. KAZINFORM - Memlekettik keńesshi Erlan Qarın Ulttyq quryltaı músheleriniń qatysýymen ótken basqosýda jyl boıy atqarylǵan jumystardy qorytyndylady, dep habarlaıdy Aqordanyń baspasóz qyzmeti.
Memlekettik keńesshi Ulttyq quryltaı músheleri Shyǵys Qazaqstan jáne Batys Qazaqstan oblystarynda kóshpeli otyrys ótkizip, jurtshylyqpen kezdeskenin tilge tıek etti. Sondaı-aq óńirlik qoǵamdyq keńester atynan kelgen Ulttyq quryltaı múshelerimen bólek kezdeskenin atap ótti.
Erlan Qarın bastamalardyń oryndalý barysyna toqtalyp, Quryltaıdyń úshinshi otyrysynyń qorytyndysy boıynsha 40 bólimnen turatyn arnaıy jospar qabyldanǵanyn aıtty. Memlekettik keńesshi qazirdiń ózinde olardyń basym bóligi oryndalǵanyn jetkizdi. Atap aıtqanda, «Táýelsizdik jáne otanshyldyq», «Ádildik pen jaýapkershilik», «Eńbekqorlyq pen kásibı biliktilik», «Zań men tártip», «Jasampazdyq jáne jańashyldyq» sııaqty jalpyulttyq qundylyqtardy ornyqtyrýǵa qatysty eleýli bastamalar bar.
Erlan Qarın mektepterdegi jalpyulttyq qundylyqtarǵa negizdelip jańartylǵan tárbıe jumysy jónindegi baǵdarlamaǵa aıryqsha mán berdi.
Jıynda Oqý-aǵartý mınıstri Ǵanı Beısembaev Ulttyq quryltaı múshelerine bıyl 1 qyrkúıekten bastap mektepterge engizilgen «Birtutas tárbıe» baǵdarlamasynyń aralyq nátıjesin tanystyrdy. Al bala quqyqtary jónindegi ýákil Dınara Zákıeva balalardyń quqyǵyn qorǵaý salasynda memleket tarapynan jasalǵan sharalar týraly baıandady.
Jalpyulttyq qundylyqtardy dáripteý aıasynda jyl boıy ǵylym men bilim, mádenıet pen onomastıka salalarynda birqatar memlekettik jáne qoǵamdyq jobalar men bastamalar júzege asyryldy.
Ulttyq quryltaıdyń jumysyndaǵy taǵy bir baǵyt – áleýmettik keselmen kúres. Bıyl Parlament áıelderdiń quqyqtaryn jáne balalardyń qaýipsizdigin qamtamasyz etý, lýdomanııaǵa qarsy is-qımyl, vandalızmmen kúres, veıpke tyıym salý máseleleri boıynsha birqatar zań qabyldap, olarǵa Prezıdent qol qoıdy. Sondaı-aq birer kún buryn Parlamentte esirtki bıznesimen kúres týraly zań qabyldanyp, qujat Prezıdentke qol qoıýǵa joldandy. Osy zańdardyń barlyǵyn ázirleýge Quryltaı músheleri belsendi atsalysty.
Erlan Qarın Ulttyq quryltaı múshelerine Memleket basshysynyń tórt aýqymdy ınfraqurylymdyq bastamasynyń júzege asyrylý nátıjeleri týraly málimet berdi. Bul bastama Atyraýda ótken úshinshi otyrysta jarııa etilgen bolatyn.
Jalpy, Memlekettik keńesshi jyldy qorytyndylaı kele, Ulttyq quryltaıdyń tıimdi dıalog alańy ǵana emes, sondaı-aq qoǵamdaǵy ózekti máselelerdi kóteretin negizgi ortalyqtyń birine aınalǵanyn atap ótti.
Osyǵan deıin Erlan Qarınge suraq qoıǵan qytaılyq ǵalym synǵa ushyraǵany týraly jazdyq.