Ulttyq quryltaıda usynylǵan bastamalar oryndalyp keledi – Erlan Qarın
ASTANA. KAZINFORM – Memlekettik keńesshi, Qazaqstan Prezıdenti janyndaǵy Jastar saıasaty jónindegi keńestiń tóraǵasy Erlan Qarın oıyn bıznesi, lotereıa jáne lotereıa qyzmeti máseleleri boıynsha zańnamalyq túzetýlerge pikir bildirdi.
«Ulttyq quryltaıdyń úshinshi otyrysynda usynylǵan bastamalardy naqty júzege asyrý jalǵasýda. Búgin Májilis birinshi oqylymda oıyn bıznesi, lotereıa jáne lotereıa qyzmeti máseleleri boıynsha zańnamalyq túzetýlerdi qabyldady. Bul túzetýlerge depýtattar Qasym-Jomart Toqaevtyń Atyraýdaǵy sózinen keıin bastamashylyq etti, onda Prezıdent qazirgi qoǵamnyń bes negizgi áleýmettik máselesin ataǵan edi», - dep jazdy E. Qarın Telegram paraqshasynda.
Atap aıtqanda, Ulttyq quryltaı otyrysynda Prezıdent lýdomanııa myńdaǵan otbasylardy qıratyp, kóptegen adamdardy qylmysqa ıtermelep, sansyz qıynshylyqtar ákeletinin atap ótti.
Sondyqtan Memleket basshysy Parlamenttiń qazirgi sessııasynda oıynǵa táýeldilikke qarsy is-qımyl týraly zań qabyldaýdy jáne lýdomanııamen kúresýdiń keshendi josparyn ázirleýdi tapsyrdy.
«Eske sala keteıin, zań jobasyn talqylaýǵa Ulttyq quryltaı men Prezıdent janyndaǵy jastar saıasaty jónindegi keńestiń músheleri belsendi qatysyp, bul máseleni qoǵamdyq salada alǵashqylardyń biri bolyp kóterdi», - dedi E. Qarın.
