Ulttyq quryltaıda Prezıdent usynǵan bastamalar qalaı júzege asady
ASTANA. KAZINFORM — Memlekettik keńesshi Erlan Qarın Atyraýda ótken Ulttyq quryltaıdyń úshinshi otyrysynda aıtylǵan Prezıdent tapsyrmalary men bastamalaryn oryndaý máselesi jóninde keńes ótkizdi.
Jıynǵa Premer-Mınıstrdiń orynbasary Tamara Dúısenova, Prezıdent Ákimshiliginiń jaýapty qyzmetkerleri men qurylymdyq bólimsheleriniń jetekshileri, sondaı-aq Mádenıet jáne aqparat, Ǵylym jáne joǵary bilim, Oqý-aǵartý, Týrızm jáne sport, Іshki ister, Syrtqy ister, Qorǵanys mınıstrlikteriniń, Qazaqstan halqy assambleıasynyń, Qazaqstannyń strategııalyq zertteýler ınstıtýtynyń jáne QR Prezıdenti janyndaǵy ortalyq kommýnıkatsııalar qyzmetiniń basshylary qatysty.
Keńes barysynda Prezıdenttiń bastamalary men tapsyrmalaryn oryndaý úshin ortalyq jáne jergilikti memlekettik organdardyń jumysyn uıymdastyrý máselesi egjeı-tegjeıli talqylandy.
Erlan Qarın Prezıdenttiń Atyraýda ótken quryltaıdaǵy sózinde mádenı-gýmanıtarlyq jáne ıdeologııalyq saladaǵy memlekettik saıasattyń tujyrymdamalyq tyń tásilderi aıqyndalǵanyn atap ótti.
Memleket basshysynyń bastamalaryn júzege asyrý úshin ýákiletti memlekettik organdarǵa Parlamentpen birlese otyryp, esirtki óndiretin adamdarǵa jaýapkershilikti qatańdatýǵa qatysty, sondaı-aq memlekettik nagradalar, onomastıka, arheologııalyq qyzmet týraly zańnamaǵa jáne basqa da zań jobalaryna túzetýler engizý jóninde tapsyrma berildi.
Sonymen qatar lýdomanııamen kúresý úshin keshendi baǵdarlama ázirleý tásilderi qarastyryldy.
Ýákiletti memlekettik organdarǵa Prezıdent usynǵan jalpyulttyq qundylyqtardy arnaıy keshendi josparǵa sáıkes ilgeriletý úshin júıeli jumys uıymdastyrý mindeti júkteldi.
