Ulttyq quryltaıda kóterilgen máselelerge qatysty durys sheshim qabyldanyp keledi - depýtat

BÝRABAI. KAZINFORM – Ulttyq quryltaıdyń bir ereksheligi – ol jerde áleýmettik-ekonomıkalyq baǵyttan bólek, ıdelogııalyq ári tárbıelik mańyzy joǵary taqyryptar talqylanady. Bul týraly búgin ótetin Ulttyq quryltaı aıasynda Májilis depýtaty Juldyz Súleımenova málim etti.

Жұлдыз Сүлейменова
Фото: Parlam.kz

- Búgin Memleket basshysy Qasym-Jomart Toqaevtyń qatysýymen Ulttyq quryltaıdyń tórtinshi otyrysy ótedi. Elimiz úshin óte mańyzdy basqosý bolady dep oılaımyn. Jalpy, osyǵan deıingi úsh quryltaıda biz sheshimi qıyn, 30 jyldan astam ýaqyt boıy qordalanǵan kúrdeli máselelerdi qarastyrdyq. Sonyń zańnamalyq sheshimin de, onyń oryndalýyna qatysty qadamdardy qabyldadyq. Qazir atalǵan sheshimderdiń durys ekeni ýaqyt óte kele dáleldendi. Máselen, lýdomanııaǵa qarsy kúreste naqty sheshimder jasaldy. Memlekettik qyzmetshilerge, áskerılerge qumar oıyndarǵa barýyna tyıym salyndy. Sonymen qatar, úlken úılerdiń syrtyndaǵy jarnamalarda oıyn bıznesine qatysty jarnama ileýge de tyıym bar. Bul sheshimdi qabyldaý kúrdeli bolǵany túsinikti, biraq halyq úshin kerek sheshim boldy, - dedi J. Súleımenova tilshiler suraǵyna jaýap bere otyryp.

Onyń aıtýynsha, áıelderdiń quqyqtaryn qorǵaý men balalardyń qaýipsizdigin saqtaý týraly zań birazdan beri kóp talqylanǵan. Bul rette, densaýlyqqa qasaqana zııan keltirý, uryp-soǵý baptary qylmys sanatyna jatqyzyldy. Osy zań qabyldanǵannan keıin, ońtaıly ózgerister baıqaldy.

- Atap aıtqanda, jastardy tártipke shaqyrý turǵysynda tıisti zańnamalyq túzetýler boldy. Býllınge qatysty ákimshilik quqyqbuzýshylyq kodeksinde arnaıy jaýapkershilik qarastyryldy. Jahandaný zamanynda ulttyq qundylyqtarymyz tarazyǵa túsken kezde, ózimizdiń qundylyqtarymyzdy zańmen bekitýimiz qajet ekenin tolyqqandy túsinip otyrmyz, - dedi depýtat.

J.Súleımenova Ulttyq quryltaıdyń otyrystarynda kóterilgen máseleler aıasynda 10 zań jobasyna bastamashylyq jasalǵanyn, onyń ishinde toǵyz qujat qabyldanǵanyn eske saldy.

- 10-shy zań jobasy arheologııaǵa baılanysty. Bul rette mádenı jádigerlerimizdi saqtaý, arheologııa salasynyń damýyna qatysty qujat Májilistiń qaraýyna engizildi. Osynyń bári - kúrdeli máseleler. Ulttyq quryltaıdyń bir ereksheligi – ol jerde áleýmettik-ekonomıkalyq baǵyttan bólek, ıdelogııalyq ári tárbıelik mańyzy joǵary taqyryptar talqylanady. Quryltaıda Prezıdent Ákimshiliginiń, Parlamenttiń, Úkimettiń, sondaı-aq azamattyq qoǵam ókilderi jáne árbir óńirdiń azamattary pikirlerin ortaǵa salyp keledi. Bul jerde barlyǵynyń pikiri teń dárejede, - dedi ol.

Depýtattyń paıymynsha, búgingi quryltaı otyrysynda eńbek adamyna erekshe ekpin qoıylýy múmkin.

- Eńbek adamyna qatysty memlekettik baǵdarlama qabyldansa eken degen úmitim bar. Keıingi úsh jylda eńbek adamyna degen qurmet jaıyndaǵy taqyryp kóterilip keledi. Kóshe nemese áleýmettik nysandardyń tazalyǵyna jáne basqa da aýqymdy jumystarǵa eńbek adamdarynyń úlesi zor. Sondyqtan eńbekti baǵalaý úshin osy adamdarǵa arnalǵan mártebesin eskeretin memlekettik baǵdarlama qabyldanǵan jón. Ekinshiden, aýyl máselesi nazardan tys qalmaıdy dep sanaımyn. Úshinshiden, kitap máselesi bar. Balalardyń damýyna kitap oqytýdyń mańyzy zor. Osy oraıda balalarǵa paıdaly týyndylardy keńinen nasıhattaý kerek. Jalpy, bul baǵytta kitap oqýǵa baılanysty memlekettik baǵdarlama qabyldaý kerek dep oılaımyn, - dedi Juldyz Súleımenova.

Eske salsaq, budan buryn Qasym-Jomart Toqaev Býrabaıda ótetin Ulttyq quryltaıdyń IV otyrysyna qatysatyny habarlanǵan edi.

Ulttyq quryltaı jyldan-jylǵa mańyzdy alańǵa aınalyp keledi. Bul pikirdi Parlament Májilisiniń depýtaty Ashat Aımaǵambetov aıtty.

 

Сейчас читают