Ulttyq quryltaıda qabyldanǵan sheshimder qalaı júzege asady
ASTANA. KAZINFORM — Májilis depýtaty Erlan Saırov Jibek Joly radıosynyń «WAKE UP» tańǵy shoýyna suhbat berip, ulttyq quryltaıdyń bolashaq reformalarǵa qalaı áser etetini jóninde pikir bildirdi.
Májilis depýtaty Prezıdenttiń saıası reformalaryna toqtaldy.
– 2019 jyldyń naýryz aıynda Prezıdent Qasym-Jomart Toqaev bılikke kelgende, eger Qazaqstanda saıası reformalar júrgizilmese, halyqtyń áleýmettik suranysyn qamtamasyz etý múmkin bolmaıtynyn málimdegen edi. Bul — Prezıdent Toqaevtyń eń alǵashqy ári mańyzdy málimdemeleriniń biri. Osydan keıin Qazaqstanda saıası reformalardyń júıeli baǵdarlamasy qalyptasty dep aıtýǵa bolady. Saıası reformalar 2019 jyldan bastap kezeń-kezeńimen júzege asyryla bastady. Al Ulttyq quryltaı – elimizdegi bılik pen halyqtyń, memleket pen qoǵamnyń arasyndaǵy ózara baılanysty nyǵaıtatyn tıimdi alań jáne ózara qarym-qatynastyń ońtaıly formasy, – dedi Májilis depýtaty.
Ulttyq quryltaıǵa Qazaqstannyń barlyq óńirinen ókilder, túrli áleýmettik top músheleri, sondaı-aq memlekettik organ ókilderi qatysady. Eń mańyzdysy, Quryltaı barysynda aıtylǵan árbir pikir nazardan tys qalmaıdy. Barlyq usynys jan-jaqty saraptalyp, sonyń negizinde naqty sheshim qabyldanady.
– Bıylǵy Quryltaıda Prezıdent baıandamasynyń mazmuny men qamtyǵan taqyryptary óte aýqymdy, ulttyq sıpatqa ıe boldy. Ulttyq quryltaıdyń ózi – halyqpen tikeleı dıalog alańy. Sondyqtan Prezıdenttiń halyqqa Joldaýy resmı formatta ótetin bolsa, Ulttyq quryltaıda halqymyzdyń rýhanı bolashaǵy, ulttyq bolmysymyz týraly degen máseleler keńinen qozǵalady, – dedi E.Saırov.
Sonymen birge, depýtat quryltaı ótetin óńirlerdiń geografııasy únemi ózgerip otyratynyn atap ótti. Buǵan deıin Quryltaı ótken Ulytaý, Túrkistan, Atyraý jáne Qyzylorda aımaqtarynyń tańdalýy tegin emes.
– Qyzylordanyń qazaq halqy úshin tarıhı ári rýhanı mańyzy erekshe. Eń aldymen, Qyzylorda – bir kezderi Qazaqstannyń astanasy bolǵan qala. Bul onyń el tarıhyndaǵy ornyn aıqyndaıtyn mańyzdy derek. Sonymen qatar Syr óńiri halqymyzdyń rýhanı álemine, mádenıetine ólsheýsiz úles qosqan aımaq. Munda jyraýlyq dástúr erekshe damyǵan, Shyńǵys jyraý sııaqty tulǵalar osy óńirden shyqqan. Bul Qyzylordanyń mádenı-rýhanı áleýetin kórsetetin mańyzdy faktorlar, – dedi depýtat.
Spıkerdiń aıtýynsha, Ulttyq quryltaıda qabyldanǵan sheshimderdiń júzege asyrylýy, eń aldymen, Jalpyulttyq jospardy ázirleý arqyly qamtamasyz etiledi. Bul josparǵa quryltaı barysynda kóterilgen barlyq negizgi másele engiziledi.
– Jalpyulttyq jospar aıasynda memleket deńgeıinde qandaı sheshimder qabyldanýy kerek, qandaı zańdar men tujyrymdamalar ázirlenýi qajet ekeni, sondaı-aq óńirlerde qandaı naqty basqarýshylyq sheshimder júzege asyrylýy tıis ekeni aıqyndalady. Bul jospar qabyldanyp qana qoımaı, onyń oryndalýy memleket pen qoǵam tarapynan turaqty baqylaýda bolady. Máselen, eki jyl buryn depýtattar shekaralyq aımaqtardy damytý týraly zań qabyldaý bastamasyn kóterdi. Ony Prezıdent qoldady. Qazirgi tańda bul zań depýtattyq bastama retinde Májiliste talqylanyp jatyr, al kelesi kezeńde Úkimet qaraýyna usynylady. Bul zań shamamen 3,5 mıllıon azamattyń áleýmettik jaǵdaıyn jaqsartýǵa tikeleı yqpal etedi, – dedi E.Saırov.
Aıta keteıik, Memleket basshysy Qasym-Jomart Toqaevtyń Ulttyq quryltaıdyń besinshi otyrysynda sóılegen sózin Kazinform saıtynan oqýǵa bolady.