Ulttyq quryltaı usynystary zańnamalyq bastamalarǵa negiz boldy – senator
ASTANA. KAZINFORM – Ulttyq quryltaı eldik oıdy jınaqtap, damý jolyn naqtylaı túsken tarıhı jıyn boldy. Bul týraly senator Rýslan Rústemov málim etti.
- Ulttyq quryltaı taǵy bir márte el úshin eń mańyzdy suraqtardyń ashyq ári jaýapkershilikpen talqylanatyn alańy ekenin kórsetti. Bul jaı jıyn emes, qoǵamnyń úni estiletin, sózdiń iske aınalatyn orny. Memleket basshysy Qasym-Jomart Kemeluly Toqaev bastamashy bolǵan reformalar dál osy ádilettilik qaǵıdatyna súıenip júzege asýda. Konstıtýtsııalyq jáne saıası jańǵyrý qoǵam men bılik arasyndaǵy senimdi nyǵaıtyp, azamattardyń el damýyna aralasýyna jol ashty. Ulttyq quryltaı – sol senimniń naqty kórinisi. Munda kóterilgen usynystar tek pikir retinde qalyp qoımaı, zańnamalyq bastamalarǵa, memlekettik baǵdarlamalarǵa, óńirlik jobalarǵa aınalyp otyr. Áıelder men balalardyń quqyǵyn qorǵaý, veıpterge tyıym salý, qoǵamdyq ádep, onomastıka jónindegi, vandalızmmen kúres, oıyn bıznesin shekteý sekildi mańyzdy sheshimder osy alańda aıtylǵan oılardyń jemisi, - dedi R. Rústemov.
Onyń paıymynsha, bıylǵy quryltaıdyń erterek ótýi de kezdeısoq emes. Qıyn geosaıası jaǵdaıda eldiń ishki turaqtylyǵy men qaýipsizdigin qamtamasyz etý úshin batyl ári ýaqtyly sheshimder qajet. Qyzylordada ótken Quryltaıdyń sektsııalyq otyrystarynda áleýmettik-mádenı damý, bilim men ǵylym, azamattyq qoǵam, ekonomıkalyq saıasat baǵyttarynda naqty usynystar ortaǵa salyndy. Ár bastama hattamalanyp, júzege asyrý tetikteri qarastyrylatyny quryltaı jumysynyń nátıjege baǵyttalǵanyn kórsetedi.
- Qazirgi ýaqytta elimizde Memleket basshysynyń bastamasymen júrgizilip jatqan saıası jáne konstıtýtsııalyq reformalar qoǵam men memleket arasyndaǵy qatynasty túbegeıli jańa deńgeıge kótergenin atap ótken jón. Ádilettilikke negizdelgen bul ózgerister halyqtyń bılikke degen senimin nyǵaıtyp, azamattardyń el damýyna tikeleı aralasýyna múmkindik berdi. Osy turǵydan alǵanda, bıylǵy Ulttyq quryltaıdyń Qyzylordada ótýi tereń sımvoldyq mánge ıe. Bir kezderi Qazaq eliniń astanasy bolǵan Syr óńiri tarıhta talaı taǵdyrly sheshimder qabyldanǵan qasıetti meken. Demek, sol kezeńnen týra bir ǵasyr ótken soń quryltaıdyń dál osy jerde ótýi ótken men búginniń sabaqtastyǵyn aıqyn kórsetetin mańyzdy tańdaý. Búgingi Ulttyq quryltaıda el damýynyń eń ózekti ári taǵdyrly máseleleri keńinen kóterilip, naqty baǵyt-baǵdar aıqyndaldy. Quryltaıda Qyzylorda oblysynyń áleýmettik-ekonomıkalyq damýyna erekshe nazar aýdarylyp, sońǵy úsh jylda óńirde 34 bilim berý, 45 mádenıet pen sport nysany jáne 40 medıtsına mekemesiniń salynǵany atap ótildi. Memleket basshysy óńirdegi oń ózgeristerdi oblys ákimi Nurlybek Máshbekuly Nálibaevtyń belsendi, tabandy eńbeginiń nátıjesi retinde baǵalap, Qyzylordada 300 oryndyq kóp beıindi aýrýhananyń qurylysy bastalǵanyn, aldaǵy ýaqytta 500 oryndyq emhana men 200 oryndyq perzenthana salynatynyn jetkizdi. Sonymen qatar bıyl jańa drama teatr men úlken kitaphana qurylystaryn bastaý qajettigin atap ótti, - dedi depýtat.
Infraqurylym salasynda da mańyzdy sheshim qabyldanyp, Batys Eýropa – Batys Qytaı halyqaralyq dáliziniń Qyzylorda–Aqtóbe baǵytynda tórt jolaqty avtojol qurylysy bıyl bastalatyny súıinshi jańalyq retinde jarııalandy.
- Quryltaıda Syr óńiriniń taǵdyrymen bite qaınasqan Aral máselesi de keńinen sóz bolyp, Soltústik Araldy saqtap qalý jolyndaǵy jetistikter, Kókaral bógetin bıiktetý jobasynyń osy jyldyń sońynda bastalatyny jáne sý resýrstaryn basqarýda kórshi memlekettermen sheber dıplomatııalyq qarym-qatynas jasaýdyń mańyzdylyǵy erekshe atap ótildi. Sonymen birge sý máselesiniń strategııalyq sıpat alatyny, halyqaralyq deńgeıde Halyqaralyq sý uıymyn qurý bastamasy jáne aldaǵy ekologııa sammıtinde Aral taǵdyrynyń talqylanatyny aıtyldy. Quryltaıdyń basty ózegine aınalǵan taǵy bir mańyzdy baǵyt – saıası reformalar boldy. Bolashaq Parlamenttiń jańa úlgisi, onyń qurylymy men mandat sany, «Quryltaı» ataýyn berý, vıtse-prezıdent ınstıtýtyn engizý, Qazaqstannyń Halyq Keńesin qurý, sondaı-aq Konstıtýtsııalyq komıssııa jasaqtaý jóninde naqty usynystar jarııalandy. Osylaısha, búgingi Ulttyq quryltaı áleýmettik damý, ınfraqurylym, ekologııa, sý qaýipsizdigi jáne saıası jańǵyrý baǵyttaryn birtutas qarastyryp, «Kúshti Prezıdent – yqpaldy Parlament – esep beretin Úkimet» qaǵıdatyna negizdelgen ádiletti ári ornyqty memleketti qalyptastyrýǵa baǵyttalǵan tarıhı sheshimder alańyna aınaldy. Syr boıynda ýaqytynan buryn ótken Ulttyq quryltaı taǵy bir márte eldik oıdy jınaqtap, ádiletke negizdelgen damý jolyn naqtylaı túsken tarıhı jıyn boldy, - dedi senator.
Budan buryn habarlanǵandaı, Prezıdent jańa Parlamentke «Quryltaı» degen ataý berýdi usyndy.