Ulttyq quryltaı: Prezıdent qazaqstandyqtardyń júrip-turý erkindigin arttyrýdy tapsyrdy

QYZYLORDA. KAZINFORM — Memleket basshysy Qasym-Jomart Toqaev V Ulttyq quryltaıda jańa halyqaralyq áýe reısterin ashýdy tapsyrdy.

 — Bıyl «Qyzyljar — Moıynty» jáne «Darbaza — Maqtaaral» temirjol jelileri salynady. Sondaı-aq «Altynkól — Jetigen» jáne «Jezqazǵan-Sekseýil» ýchaskeleri jańǵyrtylady. Qazaqstan úshin áýe qatynasyn damytýdyń erekshe mańyzy bar. Jańa halyqaralyq reısterdi iske qosý qajet. Bul tek ekonomıka ǵana emes, sondaı-aq azamattar búkil álem boıynsha júrip-turý erkindigin paıdalanatyn bizdiń memleketimizdiń ashyq qoǵam retindegi mártebesimen baılanysty másele, — dedi Prezıdent.

Memleket basshysy Qazaqstan aýmaǵy arqyly onnan astam halyqaralyq marshrýttar ótip jatqanyn oń úrdis dep baǵalaıtynyn aıtady.

— Ony barlyq jaǵynan yntalandyrý qajet. Dál qazir Qazaqstan ózin halyqaralyq tranzıttik-kólik toraby retinde kórsetýi tıis, — dedi Qasym-Jomart Toqaev.

Sondaı-aq, Memleket basshysy júk tasymaldaıtyn áýe kompanııasyn qurý týraly tapsyrmasy durys oryndalmaı jatqanyn aıtyp, Úkimettiń sheshimin synady.