Ulttyq quryltaı: Prezıdent bastamalary Nıý-Delıdegi konferentsııada tanystyryldy
ASTANA. KAZINFORM — QR Ortalyq saılaý komıssııasynyń tóraǵasy Nurlan Ábdirov bastaǵan delegatsııa Nıý-Delıde ótip jatqan demokratııa jáne saılaýdy basqarý máselelerine arnalǵan halyqaralyq konferentsııaǵa qatysyp jatyr, dep habarlaıdy vedomstvonyń baspasóz qyzmeti.
Іs-sharany Úndistannyń Saılaý komıssııasy men BUU janyndaǵy Turaqty baıqaýshy mártebesine ıe, sondaı-aq Eýropalyq odaqtyń mańyzdy jobalary boıynsha seriktesi sanalatyn Demokratııa men saılaýǵa járdemdesý jónindegi halyqaralyq ınstıtýtpen (International IDEA) birlesip uıymdastyrdy.
Nurlan Ábdirov konferentsııa aıasynda saılaý organdary basshylarynyń plenarlyq sessııasynda, sondaı-aq «Táýelsiz jáne kásibı saılaýdy basqarý organdary — turaqty demokratııa úshin» atty jahandyq taqyryptyq sessııada baıandama jasady.
Qyryq úsh elden kelgen áriptesterine arnaǵan sózinde QR OSK tóraǵasy «Qazaqstannyń saılaý júıesin reformalaý: saılaý organdaryn kásibılendirý» taqyrybyndaǵy baıandamasyn tanystyrdy. Onda 2022 jyly Prezıdent Q.K. Toqaev bastamashy bolǵan konstıtýtsııalyq reformalar aıasyndaǵy saılaý júıesiniń transformatsııasyna erekshe nazar aýdaryldy. Elde saılaý júıesi men ókildi bılik organdaryn qalyptastyrý tártibi jańǵyrtyldy. Aýyl ákimderi korpýsynyń jańarýy mańyzdy kezeń boldy.
— Eýropa, Amerıka, Azııa jáne ózge de elderdiń saılaý organdary basshylarymen ótken kezdesýler men tanystyrylymdar barysynda Nurlan Ábdirov Memleket basshysynyń V Ulttyq quryltaıda sóılegen sóziniń negizgi tujyrymdaryn aýdıtorııanyń nazaryna usyndy. Qatysýshylar eldiń saıası júıesin odan ári damytý basymdyqtary, birpalataly Parlamentke kóshý josparlary, memlekettiń ınstıtýtsıonaldyq negizin nyǵaıtý baǵyttary týraly jan-jaqty aqparat aldy. Konstıtýtsııalyq komıssııa qurý jáne Negizgi zańǵa engiziletin ózgerister jobasyn jalpyulttyq referendýmǵa shyǵarý týraly sheshim de zor qyzyǵýshylyq týdyrdy, — delingen habarlamada.
Halyqaralyq konferentsııa jumysy jalǵasyp jatyr, QR OSK tóraǵasynyń orynbasary Muhtar Erman «Qazaqstan Respýblıkasynda saılaý uıymdastyrýshylaryn elektoraldy oqytýdyń ózekti máseleleri» taqyrybynda baıandama jasaıdy.
Budan buryn saıasattanýshy Azamat Baıǵalıev Memleket basshysy usynǵan reformalar is júzinde jańa Konstıtýtsııanyń qabyldanýyna alyp kelýi múmkin ekenin aıtty.