Ulttyq quryltaı qoǵamdy ashyq pikir almasýǵa biriktiretin alańǵa aınaldy — Ǵazız Ábishev
ASTANA. KAZINFORM — Ulttyq quryltaı strategııalyq máselelerdi keń aýqymda talqylaýǵa múmkindik beretin tıimdi dıalog alańy retinde qalyptasty. Bul týraly saıası sholýshy, ulttyq quryltaı múshesi Ǵazız Ábishev aıtty.
Onyń aıtýynsha, saıasattaný ǵylymynda «delıberatıvti demokratııa» dep atalatyn uǵym bar. Bul — saıası básekeden tys, qoǵamnyń túrli toptaryn el damýyna qatysty mańyzdy sheshimderdi talqylaýǵa tartatyn tetik.
— Mundaı keńesshi formattaǵy ınstıtýttar kóptegen elde bar. Máselen, Frantsııadaǵy Ekonomıkalyq jáne áleýmettik keńes, Reseıdegi Qoǵamdyq palata, Qyrǵyzstandaǵy quryltaı nemese Kanadadaǵy uqsas qurylymdardy aıtýǵa bolady. Zań shyǵarýshy organdar partııalyq tártip pen saıası tartys ústinde jumys isteıtindikten, olarda belgili bir «saıası oıyn erejeleri» qalyptasady. Al ókilettik bıligi joq keńesshi alańdar pikir almasýǵa erkindik berip, qoǵamdaǵy túrli toptardy jaqyndastyrady, — dedi Ǵazız Ábishev.
Sarapshynyń pikirinshe, Qazaqstandaǵy Ulttyq quryltaı dál osy mıssııany atqaryp otyr.
Ol Memleket basshysynyń halyqpen baılanys ornatatyn Joldaýlar, Qazaqstan halqy Assambleıasynyń sessııalary, partııa sezderi formattarynyń ishinde Ulttyq quryltaı erekshe oryn alatynyn atap ótti.
— Quryltaıdyń tarıhı máni bar. Quryltaı — eldiń túkpir-túkpirinen kelgen ókilder jınalatyn alań. Prezıdent dál osy jerde el damýyna qatysty strategııalyq bastamalaryn tikeleı jarııalaı alady, — dedi ol.
Aldaǵy quryltaı otyrysynda keń aýqymdy máseleler, sonyń ishinde saıası reformalar da talqylanýy múmkin ekenin joqqa shyǵarmaıdy.
— Kópshilik tek plenarlyq otyrysty jáne Prezıdenttiń sózin kóredi. Alaıda odan aldyn eki kún boıy sektsııalyq jumystar ótedi. Aımaqtardan kelgen delegattar ashyq mıkrofon formatynda, esh shekteýsiz pikir almasady. Osyndaı mazmundy talqylaýlar barysynda qoǵamdyq konsensýs (kelissózder barysynda qandaı da bir másele boıynsha daýys berýsiz ortaq sheshimge kelý — red.) qalyptasady. Tipti, osy alańda parlamenttik reforma nusqasy sheshilýi múmkin, — dedi saıası sarapshy.
Aıta keteıik, buǵan deıin Memleket basshysy Ulttyq quryltaıdyń kezekti otyrysyn 20 qańtarda ótkizý týraly sheshim qabyldaǵanyn jazǵan edik.