Ulttyq quryltaı: Qazaqstanda jańa konsýltatıvtik organ qurylady

QYZYLORDA. KAZINFORM — Prezıdent Qasym-Jomart Toqaev V Ulttyq quryltaıda jańadan qurylatyn Halyq keńesi ınstıtýtynyń zańdyq mártebesi qandaı bolatynyn aıtty.

— Halyq Keńesi óz máni boıynsha basqa elderdiń konsýltatıvtik qurylymdarynyń tájirıbesin sińirgen jańa memlekettik organ bolady. Onda barlyq etnos, ulystar men aımaqtar ókildik alady. Qazaqstannyń Halyq Keńesi elimizdiń joǵary konsýltatıvtik organy mártebesine ıe bolady, — dedi Qasym-Jomart Toqaev.

Memleket basshysy keńes quramyn 126 adamnan asyrmaýdy usyndy. Etnomádenı birlestikterden — 42, qoǵamdyq birlestikterden — 42, máslıhattar men óńirlik qoǵamdyq keńesterden — 42 ókil bolý kerektigi de aıtyldy.

— Halyq Keńesiniń barlyq múshesin Prezıdent taǵaıyndaıdy, al tóraǵany onyń músheleri saılaıdy. Halyq Keńesi tóraǵasynyń qoǵamdyq negizde rotatsııalyq negizde taǵaıyndalǵan eki orynbasary, sondaı-aq hatshylyqtyń basshysy bolady, — dedi Prezıdent.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr. 

Budan buryn Konstıtýtsııanyń preambýlasy ulttyq qundylyqtarymyzdy aıshyqtaıtyndaı qaıta jazylatyny belgili boldy.