Ulttyq quryltaı: búgin jumys sektsııalarynyń otyrysy bastalady

Atap aıtqanda, 20 qańtar kúni Qyzylorda qalasynda Ulttyq quryltaıdyń besinshi otyrysy ótedi. Otyrysqa Memleket basshysy, tanymal memleket jáne qoǵam qaıratkerleri, saıası partııalardyń, úkimettik emes sektordyń, bıznes-qaýymdastyqtardyń, saraptamalyq qaýymdastyqtyń jáne oblystardyń qoǵamdyq keńesteriniń ókilderi qatysady dep josparlanǵan.

Al 19 qańtar kúni 4 jumys sektsııasynyń otyrysy ótedi:
– «Azamattyq qoǵam»;
– «Ekonomıkalyq damý»;
– «Áleýmettik-mádenı damý»;
– «Bilim jáne ǵylym».

Ulttyq quryltaı múshesi Serik Aqylbaıdyń aıtýynsha, Ulttyq quryltaıdyń Qyzylorda qalasynda ótetin besinshi otyrysyna daıyndyq qarqyny óte jaqsy.

- Buǵan deıin ótken tórt quryltaıda kóterilgen taqyryptar boıynsha birqatar zań qabyldanyp, biraz másele sheshildi. Al 20 qańtarda ótetin besinshi otyrysta Parlamentti reformalaý taqyryby qaralady dep oılaımyn. Quryltaı aıasynda quqyqtyq aǵartý máselesi týraly sóıleýim múmkin. Jalpy bıylǵy otyrys jyldaǵydan erterek ótkeli jatyr jáne oǵan qyzý daıyndyq júrip jatyr, - dedi S. Aqylbaı.

Al Májilis depýtaty, Ulttyq quryltaı múshesi Sergeı Ponomarevtiń paıymynsha, Ulttyq quryltaı qoǵamdaǵy ózekti máselelerdi talqylaýdyń mańyzdy alańyna aınaldy. Onyń aıasynda qala men aýyl turǵyndaryn naqty alańdatatyn taqyryptar kóteriledi.

- Ulttyq quryltaıda árkimniń ashyq ári naqty sóıleýine múmkindigi bar senim keńistigi qalyptasty. Onda túrli taqyryptar kóteriledi, ıaǵnı syrtqy jáne ishki saıasat, memlekettilik, kommýnaldyq baǵyt, sondaı-aq basqa da kez kelgen másele qaralady, - dedi depýtat.

Osy oraıda ol talqylanǵan máselelerge qatysty mańyzdy sheshimder jasalyp, zań jobalary ázirlenip jatqanyn eske saldy. Quryltaı músheleri kótergen ózekti taqyryptardyń barlyǵy nazardan tys qalmaıdy.

- Besinshi otyrysta jasandy ıntellekt jáne onymen baılanysty máseleler, tsıfrlandyrý týraly sóz qozǵalady dep sanaımyn. Sonymen qatar, memlekettik tildi jańa tásildermen, tipti standartty emes ádistermen úırený týraly usynystar bolady dep oılaımyn. Árıne, qorshaǵan ortany qorǵaý máselesi de nazardan tys qalmaıdy... Atap aıtqanda, jumys óte aýqymdy. Parlamenttik reforma taqyrybyn talqylaıtynymyzǵa senimdimin. Jalpy, Quryltaı músheleleriniń kókeıinde júrgen osy máseleler jan-jaqty qaralady degen oıdamyn, - dedi S. Ponomarev.

Budan buryn habarlanǵandaı, Memleket basshysy Qasym-Jomart Toqaev Ulttyq quryltaı otyrysy ótetin kúndi belgiledi.

Eske salaıyq, 2025 jylǵy 14 naýryzda Býrabaıda ulttyq quryltaıdyń IV otyrysy ótti. Memleket basshysy Qasym-Jomart Toqaevtyń Ulttyq quryltaıda qozǵaǵan negizgi jaıttarmen siltemege ótip tanysýǵa bolady.

Osyǵan deıin Ulttyq quryltaı aıasynda qandaı zańdar qabyldanǵanyn jazǵan edik.