Ulttyq quryltaı – 2025: Prezıdent 54 tapsyrma júktedi
ASTANA. KAZINFORM – Bıyl Býrabaıda ótken Ulttyq quryltaıdyń qorytyndysy boıynsha Memleket basshysy Qasym-Jomart Toqaev memlekettik quzyrly organdarǵa birqatar tapsyrma berdi.
- Býrabaı tórinde ótken Ulttyq quryltaıda birqatar mańyzdy másele talqylandy. Prezıdent tarapynan elimizdiń saıası jáne áleýmettik damýyna yqpal etetin ózekti tapsyrmalar berilip, quryltaı músheleriniń mazmundy usynystary aıtyldy. Atalǵan otyrysta Prezıdent tarapynan jalpy sany 54 tapsyrma berilse, onyń ishinde Mádenıet jáne aqparat mınıstrligine 21 mindet júkteldi, - dedi Mádenıet jáne aqparat mınıstri Aıda Balaeva ardagerler keńesiniń plenýmynda.
Mınıstrdiń málimdeýinshe, qazir Memleket basshysynyń tapsyrmasyn iske asyrý maqsatynda Prezıdent Ákimshiligi bekitken keshendi jospar aıasynda jumys bastalyp ketti.
- Sonymen qatar bizdiń mınıstrlikte Ulttyq quryltaıdyń jumys organy retinde quryltaı múshelerinen túsken usynystar boıynsha derbes jospar bekitildi. Quryltaı múshelerinen jalpy sany 113 usynys tússe, onyń ishinde 32-i bizdiń vedomstvoǵa qatysty usynystardy qamtıdy. Atalǵan usynystar arasynda ardagerler uıymdarymen birlese atqarylatyn mańyzdy baǵyttar da bar, - deıdi ol.
Eske salaıyq, 14 naýryzda Býrabaıda ulttyq quryltaıdyń IV otyrysy ótti. Memleket basshysy Qasym-Jomart Toqaevtyń Ulttyq quryltaıda qozǵaǵan negizgi jaıttarmen siltemege ótip tanysýǵa bolady.
Sondaı-aq búgin Memlekettik keńesshi Erlan Qarın ishki saıasat máselelerin talqylaý úshin Ulttyq quryltaı múshelerimen kezdesti.
Aıta keteıik, búgin elordada respýblıkalyq ardagerler uıymy keńesiniń kezekti plenýmy ótti. Oǵan elimizdiń barlyq óńirinen ardagerler keńesiniń tóraǵalary qatysty.