Ulttyq quryltaı 16 zańnyń qabyldanýyna yqpal etti

ASTANA. KAZINFORM — Májilis depýtaty, saıasattanýshy, Ulttyq quryltaı múshesi Samat Nurtaza «Jibek joly» radıosyna suhbat berip, quryltaıdyń tarıhı jáne saıası mańyzy, kútiletin sheshimder men aımaqtyq kún tártibi týraly pikrin bildirdi.

Depýtattyń aıtýynsha, Ulttyq quryltaı — ártúrli áleýmettik top ókilderiniń Prezıdentke tikeleı ún qatýyna múmkindik beretin alań jáne onyń quramynda qoǵamnyń barlyq salasynyń ókili bar. Qazirgi kezeńde mundaı alań óte qajet.

— Keıde qarapaıym azamat – jýrnalıst bolsyn, shahter bolsyn, muǵalim ne dáriger bolsyn, óz máselesin joǵary deńgeıge jetkizý úshin uzaq bıýrokratııalyq joldan ótýge májbúr. Aldymen bas dárigerge, odan orynbasarǵa, ákimdikke, ary qaraı taǵy túrli deńgeılerge barady. Bul ýaqytty da, kúshti de alady. Al Ulttyq quryltaıda qarapaıym azamat pen Prezıdenttiń arasynda, shyn máninde, bir ǵana adam bar. Ol – quryltaı múshesi, sol salanyń ókili. Mysaly, aýyldaǵy qarapaıym dáriger quryltaı múshesi bolyp otyrǵan dárigerge óz máselesin joldasa, ol ony kóterýge moraldyq turǵydan mindetti, — dedi S.Nurtaza.

Prezıdent jylyna bir ret arnaıy ýaqyt bólip, elimizdiń ár óńirinde – Jezqazǵan, Túrkistan, endi mine, qasıetti Qyzylorda jerinde Quryltaı ótkizedi. Syr boıyna kelip, qoǵamdaǵy túıtkildi, keıinge qaldyrýǵa bolmaıtyn máselelerdi tikeleı tyńdap, nazarǵa alady.

— Eń aldymen, bul – tarıhı data. Qyzylorda qalasynyń Qazaqstan astanasy bolǵanyna bıyl 100 jyl tolyp otyr. Syr boıyndaǵy bul qala – óte erekshe, taza ári kórikti qalalardyń biri. Tipti jeke pikirimshe, elimizdegi eń taza úsh qalanyń qataryna kiredi. Sondyqtan da Qyzylordanyń tańdalýy – óte oryndy sheshim. Onyń ústine, Prezıdenttiń kelýi Qyzylorda halqynyń da eńsesin kóterip, óńir úshin mańyzdy máseleler oń sheshimin tabady degen senim bar, — dedi depýtat.

Májilis ókiliniń pikirinshe, Quryltaıda parlamenttik reforma taqyryby kóteriledi. Qoǵamda osy reformaǵa baılanysty jańa bastamalar, jańa usynystar aıtyla ma degen úlken úmit pen qyzyǵýshylyq bar.

— Prezıdentten bul joly qoǵam óte kóp jańalyq kútip otyr. Ásirese referendým bola ma, bolmaı ma, bir palataly parlament máselesi, sondaı-aq basqa da jańa bastamalar aıtylady degen úmit bar. Sondyqtan sheshýshi sátke de az ǵana ýaqyt qaldy dep oılaımyn. Oǵan qosa, bolashaq urpaqty qorǵaý, nashaqorlyqqa, lýdomanııaǵa qarsy kúres jáne jastardyń ıdeologııasy máselesi bar, — dep atap ótti Samat Nurtaza.

Buǵan deıin Ulttyq quryltaı tórt ret ótip, 16 zańnyń qabyldanýyna yqpal etken. Mysal retinde lýdomanııa máselesin aıtýǵa bolady. Bir kezde mektepterdiń mańynda qumar oıyndardy jarnamalaıtyn bılbordtar turǵan edi, qazir olardyń bári alynyp tastaldy. Sol sııaqty nashaqorlyqqa qarsy kúres aıasynda veıp máselesi kóterildi. Qazir veıp satatyn dúkenderge qatysty da qatań shekteýler engizilip jatyr.

Aıta keteıik, 20 qańtar kúni Qyzylorda qalasynda Prezıdent Qasym-Jomart Toqaevtyń qatysýymen Ulttyq quryltaıdyń V otyrysy ótedi.