Ulttyq quramanyń formasy erkin saýdaǵa shyǵarylmaıdy – Týrızm jáne sport mınıstrligi
ASTANA.KAZINFORM – QR Týrızm jáne sport mınıstrligi ınternette Qazaqstan ulttyq quramasynyń resmı sporttyq kıimine uqsatyp jasalǵan ónimderdiń satylyp jatqany týraly eskertti. Vedomstvo memlekettik rámizderi bar forma erkin saýdaǵa shyǵarylmaıtynyn atap ótti.
QR Týrızm jáne sport mınıstrliginiń baspasóz hatshysy Balym Adamıdenovanyń aıtýynsha, ótken jyly vedomstvo alǵash ret ulttyq qurama sportshylaryn Under Armour brendi shyǵarǵan jazǵy jáne qysqy biryńǵaı sporttyq kıim jıyntyqtarymen qamtamasyz etken.
– Qazaqstan ulttyq quramalarynyń múshelerine arnaıy ázirlengen sapaly kásibı forma. Memlekettik rámizderi bar árbir jıyntyq sportshylarǵa jeke beriledi jáne erkin saýdaǵa shyǵarylmaıdy, – dedi ol.
Mınıstrliktiń málimetinshe, qazirgi ýaqytta túrli ınternet-platformalarda ulttyq quramanyń resmı sporttyq kıimine syrtqy kórinisi uqsas jáne sol formanyń atyn jamylyp satylyp jatqan ónimder paıda bolǵan.
Vedomstvo mundaı ónimderdiń Qazaqstan ulttyq quramasynyń resmı formasyna esh qatysy joq ekenin atap ótti.
– Under Armour kompanııasynyń túpnusqa sporttyq kıimderin, sonyń ishinde kostıýmderdiń uqsas úlgileri men basqa da sporttyq jabdyqtaryn brendtiń resmı dúkenderinen satyp alýǵa bolady. Alaıda Qazaqstannyń memlekettik rámizderi jáne ulttyq quramaǵa qatysty belgileri bar ónimder bólshek saýdada satylmaıdy, - dedi vedomstvo baspasóz hatshysy.
Sonymen qatar Under Armour kompanııasy da brendti zańsyz paıdalaný jáne kontrafaktilik ónimderdi taratýǵa baılanysty quqyqtyq sharalar qabyldap jatyr.
Mınıstrlik azamattardy osy aqparatty eskerip, Qazaqstan ulttyq quramasynyń resmı ekıpırovkasy retinde usynylyp otyrǵan jalǵan taýarlardy satyp almaýǵa shaqyrdy.
Aıta keteıik, Qazaqstanda brend ónimderdiń kóshirmelerin jarnamalaý men satýǵa shekteý engizilgen edi.
