Ulttyq quramanyń bas bapkeri Belgııamen matchtaǵy sensatsııa jaıly pikir bildirdi

ASTANA. KAZINFORM —  Qazaqstan ulttyq quramasy 2026 jylǵy álem chempıonatynyń irikteýin Eýropanyń myqty komandalarynyń biri — Belgııaǵa qarsy óz alańynda teń nátıjemen aıaqtady, dep jazdy Kazinform agenttiginiń menshikti tilshisi.

«Astana Arenada» ótken oıyn 1:1 esebimen aıaqtaldy. Qazaqstan quramasy matchtyń sońǵy on mınýttan astam ýaqytyn bir oıynshy jetispeı oınasa da, teń nátıjeni saqtap qaldy.

Qazaqstan quramasynyń bas bapkeri Talǵat Baısýfınov matchqa qorytyndy jasady.

— Іrikteý aıaqtaldy, biz bir upaı aldyq jáne nátıjege razymyz. Matchtyń qanshalyqty aýyr bolǵanyn bári kórdi. Belgııaǵa álem chempıonatyna shyǵý úshin jeńis qajet edi, qysym da sezildi. Biraq jigitterge «alǵys» aıtqym keledi, bárine tótep berdi, — dedi Baısýfınov.

Bapker Islam Chesnokovtyń alańnan qýylǵan sátine de jeke toqtaldy.

— Bul epızodty muqııat qarap shyǵý kerek. Match sońynda bizdiń oıynshymyz da soqqy aldy. Biraq tóreshiniń sheshimi — olardyń jumysy, — dedi ol.

Birinshi taımda Qazaqstan quramasy Dastan Satpaevtyń naqty soqqysynyń arqasynda esepte alǵa shyqty. Ekinshi taımnyń basynda belgııalyqtar tarazy basyn teńestirdi — goldyń avtory Hans Vanaken. Qyzyl kartochka men qarsylastyń qysymyna qaramastan, Qazaqstan quramasy esepti saqtap qaldy jáne resmı kezdesýlerdegi jeńilmegen serııasyn úsh oıynǵa deıin uzarta aldy.