Ulttyq qurama oıynshysy Birinshi lıgadaǵy «Ertis» sapyna aýysty

ASTANA. KAZINFORM – Qazaqstandyq jartylaı qorǵaýshy Arman Keńesov «Ertis» fýtbol komandasynyń qataryna qosyldy. Bul jóninde komandanyń baspasóz qyzmeti málim etti.

– Arman Keńesovtiń qatarymyzǵa qosylǵany jaıly resmı túrde habarlaımyz. 24 jastaǵy jartylaı qorǵaýshy ósken ólkesiniń klýbynda maýsymnyń sońyna deıin óner kórsetedi, - delingen habarlamada. 

«Ertis» fýtbol ortalyǵynyń túlegi negizgi komanda sapynda 2018 jyly tusaýkeser oıynyn ótkizgen edi. Ol «Ertis» jastar quramasynda 58, negizgi komandada 14 matchqa qatysqan.

Sondaı-aq Arman «Aqtóbe» komandasynyń jeıdesinde úsh maýsym alańǵa shyǵyp, 81 kezdesýge qatysty. Nátıjesinde 11 gol soǵyp, 6 nátıjeli pasymen kózge tústi. «Aqtóbemen» birge Qazaqstannyń vıtse-chempıony atanyp, eki márte qola júldeger bolǵan. Sonymen qatar reseılik «SKA-Habarovsk» jáne qyzylordalyq «Qaısar» klýbtarynda dop tepti. Bıylǵy maýsymda elimizdiń joǵary birinshiliginde «Astana» klýbynyń namysyn qorǵaǵan. Jalpy Qazaqstan Premer-Lıgasynda 106 match ótkizip, 14 goldy óz atyna jazdy. 

Arman Kenesov Qazaqstan ulttyq quramasy sapynda 4 oıyn ótkizgen. 

Eske salsaq, budan buryn «Turan» komandasyna jańa bapker taǵaıyndalǵanyn habarlaǵan edik.