Ulttyq qurama músheleri men bapkerlerine eńbekaqy tóleýdiń jańa tártibi túsindirildi

ASTANA. KAZINFORM – Sport jáne dene shynyqtyrý komıtetiniń resmı ókili Meıramǵazy Saparǵalıev ulttyq qurama músheleri men bapkerlerine eńbekaqy tóleýdiń jańa tártibin túsindirdi.

— Birinshi ózgeris — aılyq eseptik kórsetkishke baǵyttaý. Inflıatsııaǵa baılanysty jyl saıyn tólem quny da ózgerip otyratyn. Qazir aılyq eseptik kórsetkishke bekitilgennen keıin ınflıatsııaǵa saı birden óziniń kórsetkishteri teńesip otyrady. Ekinshiden, ár óńir ártúrli tóleıdi. Mysal retinde aıtsaq, SQO-da 400 myń tólense, ońtústik óńirde 2 mln tólenýi múmkin. Osy sebepti ol óz oblysynan qaı jaqta kóp tólense, sonda ketip qalady. Bul óńirlerdegi sporttyń damý dınamıkasyna keri áser etedi. Sondyqtan búkil óńirde sportshylarǵa birdeı jaǵdaı jasaý úshin teńestirilgen tólem júıesi engizilip otyr, - dedi ol «Jibek joly» telearnasyndaǵy «Búgin LIVE» baǵdarlamasynda.

Buıryqqa sáıkes, aı saıynǵy tólem 5-ten 250 aılyq eseptik kórsetkishke deıingi aralyqta, ıaǵnı 19660 teńgeden 983 myń teńgege deıingi aralyǵynda belgilengen. Resmı ókil olar sportshylarǵa qandaı retpen taǵaıyndalatynyn túsindirdi. 

— Bul jerde sporttaǵy kórsetkishine, medal sanyna baılanysty arnaıy krıterııler bar. Ár sportshynyń reıtıngisin qalyptastyrý kezinde olardyń bári eskeriledi. Soǵan saı árqaısysyna tólenetin qarajat kórsetiledi, - dedi Meıramǵazy Saparǵalıev. 

Aıta keteıik, 2026 jyldan bastap elimizde jattyqtyrýshylarǵa 30 paıyz ústemeaqy qosylýy múmkin.