Ulttyq qurama kóshbasshysy Jansel Denız joldamadan qur qaldy
ASTANA. KAZINFORM - Taıan qalasynda ótip jatqan lıtsenzııalyq týrnırde qazaqstandyq taekvondoshy Jansel Denız jartylaı fınalda qarsylasyna jol berip, joldamasyz qaldy.
Jansel Denız shırek fınalda mońǵolııalyq taekvondoshyny jarys jolynan taıdyrǵanymen, ókinishke qaraı joldama sarapqa salynatyn jartylaı fınalda tájikstandyq Mýnıra Abdýsolomadan jeńilip qaldy.
+67 keli salmaqta el namysyn qorǵap júrgen 33 jastaǵy Jansel Denız osyǵan deıin eki Olımpıada oıyndarynda (Rıo 2016 j men Tokıo 2021 j) el namysyn qorǵaǵan asa tájirıbeli sportshylardyń biri bolatyn. Alaıda, bıyl Parıjge barýdyń sáti túspedi. Joldamaǵa bir qadam jetpeı qaldy.
Osyǵan deıin taǵy bir otandasymyz Marııa Sevostıanova (57 kg) alǵashqy jekpe-jeginde kambodjalyq sportshy Djýlııa Mamnan jeńilip, jarys jolynan shyǵyp qalǵan edi.
Osylaısha Taıanǵa Parıj Olımpıadasynyń joldamasyna talasýǵa attanǵan 4 sportshymyzdyń ekeýi tórtjyldyqtyń basty dodasyna qatysýǵa múmkindik alsa, ekeýi joldamadan qaǵyldy.
Esterińizge sala keteıik, osyǵan deıin habarlaǵanymyzdaı, taekvondodan Qazaqstan quramasy Qytaıda eki lıtsenzııa jeńip aldy. Onyń birin búgin Samırhon Ababakırov (58 kelige deıin) ıelense, ekinshisin joldamaǵa keshe Batyrhan Tóleýǵalı (80 kelige deıin) qol jetkizdi.
Qytaıdaǵy jarysta Parıj Olımpıadasynyń joldamasyna ár salmaqta fınalǵa shyqqan eki sportshy ıe boldy. Barlyǵy týrnırde 33 memleketten kelgen tańdaýly 96 taekvondoshy kúsh synasty. Bul Saryqurlyq ókilderine lıtsenzııa beriletin sońǵy týrnır ekenin aıta keteıik.
