Ulttyq qurama bas bapkeri Belgııaǵa qarsy oıynǵa arnalǵan josparyn aıtty

ASTANA. KAZINFORM — Fýtboldan Qazaqstan ulttyq quramasynyń bas bapkeriniń mindetin atqarýshy Talǵat Baısýfınov Belgııaǵa qarsy oıyn aldyndaǵy baspasóz máslıhatynda erteńgi oıyn týraly óz pikirimen bólisti.

Baısýfınov ulttyq quramanyń ótken eki matchta jaqsy óner kórsetkenin eske saldy.

— Jigitter Belgııaǵa qarsy alǵashqy oıynda jaqsy oınady. Soltústik Makedonııa favorıt bolǵanymen, bir ǵana gol soqty. Bizge qarsy oıynda belgııalyqtardyń sál sáttiligi boldy dep aıtýǵa bolady, — dedi ol.

Sonymen qatar bas bapkerdiń mindetin atqarýshy aldaǵy oıynǵa qandaı jospar bar ekenin aıtty.

— Bizde A jospary da, V jospary da bar. Islambek Qýat sary qaǵazdardyń kóptigine baılanysty oınamaıdy. Qazirgi ýaqytta biz onyń ornyn tolyqtyratyn oıynshyny daıyndap jatyrmyz. Ol qazir keremet formada. Mundaı qarsylasqa qarsy oınaý árqashan qıyn. Biz jigitterge óz josparymyzdy tolyq kórsettik, — dedi Baısýfınov.

Onyń aıtýynsha, erteńgi oıynda tek jaqsy formadaǵy oıynshylar shyǵady.

— Ulttyq qurama tájirıbe jasaıtyn oryn emes. Erteń biz jaqsy formada bolǵan oıynshylardy alańǵa shyǵarýdy kózdep otyrmyz, — dedi Baısýfınov.

Aıta keteıik, Qazaqstandyq fýtbolshylar 15 qarasha óz alańynda 2026 jylǵy álem chempıonaty irikteý kezeńinde Belgııany qabyldaıdy. Al 18 qarashada Horvatııada Farer araldary quramasymen joldastyq kezdesý ótkizedi.

Ulttyq qurama álem chempıonaty irikteý kezeńinde J tobynda synǵa túsip jatyr. Qazir 7 kezdesýden keıin 7 upaımen tórtinshi orynda keledi. 

Osyǵan deıin habarlaǵanymyzdaı, 14 qarasha túnde Belgııa quramasy mingen ushaq elorda áýejaıyna qondy.