Prezıdent: Ulttyq qundylyqtarymyzdy kıno, mýzyka, ádebıet arqyly dáripteý asa mańyzdy
ASTANA. KAZINFORM - Memleket basshysy Ulttyq quryltaıdyń úshinshi otyrysynda sóılegen sózinde buqaralyq aqparat quraldary men kreatıvti ındýstrııa, ásirese, kıno, mýzyka jáne ádebıet arqyly negizgi qundylyqtarymyzdy dáripteýdiń mańyzdylyǵyna toqtaldy.
«Negizgi qundylyqtarymyzdy buqaralyq aqparat quraldary men kreatıvti ındýstrııa, ásirese, kıno, mýzyka jáne ádebıet arqyly dáripteý asa mańyzdy. Salalyq vedomstvo kópshiliktiń qyzyǵýshylyǵyn týǵyzatyn tyń jobalar usynýǵa tıis. Jańa qoǵamdyq etıkany ornyqtyrý isinde ortalyq organdar ǵana emes, óńirlik bılik te mańyzdy ról atqarady. Ortalyq pen aımaqtar tyǵyz baılanysta jumys isteýi kerek. Mysaly, el ishindegi eńbek kóshi-qonyn jandandyrý máselesi boıynsha Eńbek jáne halyqty áleýmettik qorǵaý mınıstrligi men oblys ákimdikteri ózara úılesimdi áreket etip, jumyla jumys isteýi qajet. Usynylyp otyrǵan qundylyqtar júıesi aǵartýshylar men qoǵam belsendilerine baǵyt-baǵdar bola alady.
Ozyq qundylyqtar bizdiń bolmysymyzdyń ajyramas bóligine aınalýy úshin ony qoǵamda jan-jaqty dáripteýdiń tıimdi tásilderin izdeý, usyný jáne taratý qajet. Sizder, Ulttyq Quryltaıdyń músheleri, osy kúrdeli ári mańyzdy jumystyń alǵy shebinde bolýǵa tıissizder. Syrttan kelmegen, ómirden irgesin ajyratpaǵan bul qundylyqtar tól tarıhymyzǵa, mádenıetimizge, bolashaqqa umtylysymyzǵa negizdelgen. Sondaı-aq barsha azamattarymyzdyń múddesine saı keledi. Ony keńinen dáriptep, ilgeriletý úshin memlekettik apparat pen qoǵamdyq kúshterdiń bári bir jaǵadan bas, bir jeńnen qol shyǵaryp, jumyla jumys isteýi qajet. Prezıdent Ákimshiligine bul jumysty baqylaýǵa alýdy jáne ıdeologııa salasyndaǵy mindetterdi oryndaý úshin keshendi jospar jasaýdy tapsyramyn», - dedi Prezıdent.
