Ulttyq qundylyqtar – eldigimizdiń aıryqsha nyshany, biregeıligimizdiń negizi – Senat tóraǵasy
Ulttyq biregeılikti saqtaýda tarıhymyzdy júıeli dáripteý asa mańyzdy. Bul týraly Senat tóraǵasy Máýlen Áshimbaev aıtty, dep habarlaıdy Kazinform.
«Álemde qazir ártúrli kúrdeli úderisterdiń beleń alyp turǵanyn bilesizder. Osy kezde ulttyq biregeılikti saqtaý, tarıhı tamyrymyzdan ajyramaý, jalpy aıtqanda, qazaqy qalyptan aınymaý ózekti máselege aınalyp otyr. Bul rette, ózderińizdeı azamattardyń jastarǵa beretin úlgi-ónegesiniń mańyzy zor dep bilemiz. Jalpy, ulttyq qundylyqtar – eldigimizdiń aıryqsha nyshany, biregeıligimizdiń negizi. Sondyqtan Prezıdentimiz Qasym-Jomart Toqaev ulttyq qundylyqtarymyzdy saqtaýǵa, damytýǵa jáne dáripteýge úlken mán berip keledi», - dedi M. Áshimbaev Senattaǵy «Ulttyq múdde» dıalog alańy otyrysynda.
Osy oraıda Senat tóraǵasy Memleket basshysy bul máselege Túrkistan tórinde ótken Ulttyq quryltaıdyń ekinshi otyrysynda keńinen toqtalǵanyn eske saldy.
«Bul rette, bizdiń ulttyq qundylyqtarymyz, eń aldymen, tilimizge, tarıhymyzǵa, mádenıetimizge, dástúrimizge jáne ata dinimizge taban tireıtini anyq. Sondyqtan biz biregeıligimizdi saqtaýda osylarǵa basymdyq berýimiz kerek. Til – ulttyq dúnıetanymnyń ózegi. Til bolmasa, ulttyń ózine tán kelbeti joıylady. Qazirgi kezde elimizde tilimizdi tuǵyryna qondyrý baǵytynda aýqymdy jumystar atqarylyp kele jatyr. Aldaǵy ýaqytta ol jumystardy odan ári jandandyrýymyz qajet. Sonymen qatar, ulttyq biregeılikti saqtaýda tarıhymyzdy júıeli dáripteý de asa mańyzdy. Tarıh – ulttyń taǵdyry. Onda bizdiń qıyn da qıly jolymyz aıqyn kórinip jatyr. Biz odan taǵylym alyp, sol arqyly búginimizdi baıyptap, bolashaǵymyzdy baǵdarlaımyz. Sol sebepti, tarıhty árdaıym tereń bilýge, ony saqtaýǵa, ásirese, óskeleń urpaqqa keńinen dáripteýge mindettimiz», - dedi Máýlen Áshimbaev.
Bul turǵyda ol Memleket basshysynyń tapsyrmasymen bir top senator asharshylyq taqyryby boıynsha biraz arhıv qujattaryn jarııalaǵanyn atap ótti. Qazirgi deıtin jeti tom jınaq ázirlendi. Bul jumys jalǵasady.
«Munyń bári – ulttyq sanany jańǵyrtýdyń tıimdi quraldary. Sondaı-aq, mádenıetimizdi jáne dástúrimizdi saqtaýǵa da aıryqsha nazar aýdarǵan jón. Bular – bizdiń ulttyq ereksheligimizdi aıqyn kórsetetin qundylyqtar», - dedi Senat tóraǵasy.
