Ulttyq kitaphanada umytylǵan merekege arnalǵan is-shara ótti - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstanda elektromobılder ımporty kúrt qysqardy - ÓzA
Sońǵy jyldary Ózbekstanda zamanaýı elektromobılder óndirisiniń jolǵa qoıylýy eldiń kólik naryǵyna jańa serpin berdi. Otandyq ónimge degen suranystyń artýy nátıjesinde respýblıkaǵa shet elderden ákelinetin elektromobılder ımporty aıtarlyqtaı tómendeı bastady.
Bul týraly osy aptada «ÓzA» aqparat agenttigi habarlady.
Habarlamada aıtylýynsha, birneshe jyl boıy elektromobılder ımporty joǵary qarqynmen ósip, bul ishki suranystyń qajettiligin óteýge baǵyttalǵan bolatyn. Alaıda jaǵdaı birtindep ózgere bastady. 2025 jyldyń qarasha aıynda Ózbekstanǵa elektromobılder ımporty sońǵy bes aıdaǵy eń tómen deńgeıge tústi.
Bul týraly Keden komıtetiniń resmı saıtynda málimdeldi.
Resmı derekterge sáıkes, qarasha aıynda elge barlyǵy 4 597 elektromobıl ımporttalyp, olardyń jalpy quny 68,2 mıllıon dollardy quraǵan. Salystyrý úshin aıtsaq, qazan aıynda 6 933, al qyrkúıekte 11 534 elektromobıl shetelden ákelingen.
Sarapshylar bul úrdisti eldegi otandyq óndiristiń nyǵaıýymen, sondaı-aq tutynýshylardyń sapaly ári tehnologııalyq turǵydan jetildirilgen modelderge bet burýymen baılanystyrady.
Baıyrǵy jylqy terisinen jasalǵan qar shańǵy qaıta jańǵyrtylyp jatyr - CNR
Altaı óńirinde ejelden kóshpendi halyqtar qysta taýly aımaqtarda ań aýlaý men qatynas úshin jylqy terisimen tabandalǵan baıyrǵy qar shańǵyny paıdalanǵan. Osy dástúrdi búginge deıin jalǵastyryp kele jatqan Altaı aımaǵy Lasty aýylynyń malshysy Sylanbek Saqyshuly – teri tabandy qar shańǵy jasaýdyń úshinshi urpaq murageri. Bul týraly Qytaıdyń Ortalyq halyq radıosy aqparattyq portalynda jarııalanǵan bolatyn. Sol aqparatty oqyrman nazaryna usynǵandy jón sanap otyrmyz.
Qytaılyq BAQ-tyń dereginshe, Sylanbek Saqyshuly 2010 jyly avtonomııaly ólke deńgeıindegi materıaldyq emes mádenı muranyń ýákildik murageri retinde bekitilgen.
Altaı General taýy halyqaralyq qar shańǵy seıil-serýen raıonynda ótken tanystyrylymda Sylanbek Saqyshuly teri tabandy shańǵynyń ereksheligin tikeleı kórsetti. Qar shańǵy jattyqtyrýshysy Shıe Lın bul shańǵynyń betkeıge kóterilýde keri syrǵanamaıtynyn, taýly jerge óte qolaıly ekenin atap ótken.
Mamandardyń aıtýynsha, baıyrǵy teri tabandy qar shańǵy negizinen jylqynyń pushpaq terisinen jasalady. Jún baǵyty artqa qaratyp bekitilip, bul shańǵynyń órge shyqqanda artqa qaraı taımaı júrýine múmkindik beredi.
CNR-dyń málimetinshe, atalǵan shańǵy úlgileri 2023–2024 jyldar aralyǵynda ótetin kórmede kópshilik nazaryna usynylǵan. Kórmege Sylanbek Saqyshuly uly Qýanyshbek Sylanbekulymen birge qatysyp, Altaıdyń dástúrli mádenıetin tanystyrǵan.
QazUÝ-de qazaq halqynyń jadynan shyǵyp ketken merekesine arnalǵan is-shara ótti – ParsToday
Parstoday aqparat agenttiginiń habarlaýynsha, 15 qarashada Qazaqstan respýblıkasy Ulttyq kitaphanasynda Almaty qalasyndaǵy Iran Islam Respýblıkasy Bas Konsýldyǵynyń uıymdastyrýymen jyldyń eń uzaq túni – ıAlda túni merekesine arnalǵan merekelik shara ótti, dep jazdy ParsToday aqparat agenttigi.
Irandyq BAQ-tyń dereginshe, buryn ejelgi túrikter qysqy kún toqyraýy qarsańynda, ıaǵnı 22 jeltoqsanda Nartýǵan merekesin toılaǵan. Bundaǵy «nar» sózi neni bildiredi? Qazaqta búginde qasıetti sáýleni «nur» deıdi, ejelde «kún» uǵymyn «nar» dep ataǵan, bertin kele bul sóz arabtyń «nur» sózimen almasty. Nartýǵan merekesi búginde qazaq halqynyń jadynan shyǵyp ketken dese de bolady. Bul merekeni búginde túrki halyqtarynyń ishinde emis-emis chývash halqy ǵana biledi.
Sondaı-aq majar halqy da ata-baba saltyn umytpaı, áli kúnge deıin Evropanyń tórinde «korachýn» degen ataýmen toılap júr. Sońǵy kezderi tatar, bashqurt halyqtary da qalpyna keltire bastady. Al Iranda ıAlda merekesi dep atalyp, atalǵan elde jalpy halyqtyq sıpatqa ıe. 2008 jyly Irannyń ulttyq qazynasy tizimine engizilgen.
Keshti Qazaqstan Ulttyq kitaphanasy dırektory Ǵazıza Qudaıbergenqyzy ashyp, Shyǵystaný fakýltetiniń magıstranty, aýdarmashy Gaýhar Omarhanova «ıAlda túni - Nartýǵan» merekesine oraı ádebıetterge sholý» atty baıandama jasady. Іs-sharada ál-Farabı atyndaǵy QazUÝ-dyń shyǵystaný fakýltetindegi ırantaný bóliminiń stýdentteri parsysha án aıtyp, óleń oqydy.
Sondaı-aq apta sońynda ParsToday basylymynda «Qazaqstan elshisi: Astana men Tegeran arasyndaǵy mádenı baılanystar myńdaǵan jyldarǵa sozylady» degen taqyryptaǵy aqparat jaryq kórdi.
ParsToday habarlaýynsha, Tegerandaǵy Qazaqstannyń elshisi Ońtalap Ońalbaev beısenbi kúni keshke, Irannyń soltústiginde ornalasqan Gorgan qalasynda ótken 17-shi halyqaralyq etnıkalyq mádenıetter festıvaliniń úshinshi keshinde Iran men Qazaqstan arasyndaǵy tarıhı jáne mádenı baılanystary týraly pikirin bildirgen. Onyń aıtýynsha, eki el arasynda tyǵyz dostyq pen súıispenshilik bar, jáne bul qarym-qatynastar tereń mádenı jaqyndyqqa ıe.
Sonymen qatar elshi eki el arasyndaǵy dıplomatııalyq qarym-qatynastarǵa toqtala otyryp, Masýd Pezeshkıannyń Qazaqstanǵa resmı sapary eki el úshin dıplomatııa, saıasat jáne mádenıet salalarynda jemisti jáne qundy nátıjeler ákelgenin tilge tıek etti.
Sondaı-aq, ol elimizdiń syrtqy saıasatyna toqtalyp, Qazaqstan táýelsiz saıasat júrgizetin táýelsiz el jáne Irandy saıası jáne mádenı salalardaǵy mańyzdy seriktesteriniń biri dep sanaıtynyn aıtqan.
QMDB Tóraǵasy shetelde oqıtyn jastardyń din men dástúr sabaqtastyǵyn ustanýy asa mańyzdy ekenin basa aıtty - Eurasia Today
Qazaqstan musylmandary Dinı basqarmasynyń tóraǵasy, Bas múftı Naýryzbaı qajy Taǵanuly Kaır qalasynda bilim alyp júrgen qazaqstandyq stýdenttermen kezdesti, dep habarlaıdy Eurasia Today aqparat agentti.
Atalǵan BAQ-tyń Qazaqstan musylmandary Dinı basqarmasynyń baspasóz qyzmetine silteme jasap habarlaýy boıynsha, kezdesý Bas múftı Naýryzbaı qajy Taǵanulynyń Mysyr Arab Respýblıkasyna jumys sapary aıasynda ótken.
Bas múftı Naýryzbaı qajy Taǵanuly Ál-Azhar ýnıversıtetiniń oqý ǵımaratynda ótken kezdesý barysynda qazaqstandyq stýdentterge alǵan bilimderin tıimdi paıdalaný máseleleri tóńireginde taǵylymdy nasıhat aıtyp, jastardy bilimge, eńbekke jáne ımandylyqqa shaqyrdy.
Sondaı-aq, Naýryzbaı qajy Taǵanuly shetelde bilim alyp júrgen jastardyń ulttyq bolmysyn saqtaýy, din men dástúr sabaqtastyǵyn ustanýy asa mańyzdy ekenin basa aıtqan.
Ejelgi qytaılyqtar qystan qalaı shyqqan? – Halyq gazeti
Ejelgi qytaılyqtar qystan qalaı shyqqanyn bilesiz be? Olar jylyný úshin hosh ıisti shamdar tutatyp (negizinen saraıda qoldanylǵan), qol jylytqysh mys peshter (alaqanǵa salyp nemese jeńge jasyryp ustaýǵa bolatyn) ustap jáne jamylǵy kıgen, dep jazady Halyq gazeti.
Qytaılyq BAQ-tyń málimetinshe, olar sondaı-aq ózen jaǵasynda balyq aýlap, ot jaǵyp, aınalanyń kórinisin tamashalaǵan, qar arystanyn jasap oınaǵan. Sol arqyly qystyń yzǵaryn kóktemdeı shýaqty etken.
Sonymen qatar osy aptada Halyq gazeti basylymynda «Gansý Ýveı koksterin tıegen poıyzy Qazaqstanǵa bet aldy» degen aqparat jaryq kórdi.
Atalǵan BAQ-tyń dereginshe, 17 jeltoqsan kúni Gansý (Ýveı) halyqaralyq qurlyq portynyń arnaıy temirjol jelisinen 31 vagon joǵary sapaly koks tıegen poıyz Qazaqstannyń Altynkól qalasyna baǵyt aldy.
Kelitirilgen málimetterge súıensek, bul koks tıelgen poıyz tasymaly Ýveı salyqtan bosatylǵan logıstıka ortalyǵy men «Bir beldeý, bir jol» elderinde salynǵan salyqtan bosatylǵan shetel qoımalaryna súıenip, taýarlardyń el-ishi syrtyndaǵy salyqtan bosatylǵan aımaqtar arasynda tikeleı aınalymyn qalyptastyrady. Sol arqyly eksporttyq taýarlardy sheteldegi salyqtan bosatylǵan qoımalarda saqtap, tólem alynǵannan keıin kedendik rásimderdi jasap, jetkizip berý júıesin júzege asyrady. Bul kásiporyndardyń kapıtal shyǵynyn azaıtýmen qatar, eksporttyq kásiporyndardyń negizgi múddelerin qorǵaıdy.
Túrki tilderi otbasynyń halyqaralyq kúni Ankarada atalyp ótti - TRT
ıÝNESKO túrki tilderin «dúnıejúzilik qundylyq» retinde resmı túrde tanyǵannan keıin 15 jeltoqsan Túrki tilderi otbasynyń halyqaralyq kúni retinde Ankarada Túrik Tili Qoǵamy uıymdastyrǵan halyqaralyq panelmen alǵash ret atalyp ótti.
Bul týraly osy aptada Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, ıÝNESKO-nyń 2025 jyly 3 qarashada ótken 43-bas konferentsııasynda qabyldanǵan tarıhı sheshimmen túrki tilderi «ejelgi órkenıettik mura» retinde moıyndalǵan edi. Osy sheshimnen keıin Túrkııa Respýblıkasynyń Mádenıet jáne týrızm mınıstrligi jáne Túrik Tili Qoǵamynyń bastamasymen ótken is-sharaǵa memlekettik qyzmetkerler, ǵalymdar jáne túrki memleketterden kelgen dıplomatııalyq ókilder qatysty.
Іs-sharanyń ashylý rásiminde Mádenıet jáne týrızm mınıstriniń orynbasary doktor Serdar Cham túrik tiliniń tek qarym-qatynas quraly ǵana emes, sonymen birge uly órkenıettik kópir ekenin atap ótti. Ol Ankarada jaǵylǵan osy shyraqtyń túrki álemindegi mádenı yqpaldastyqty jedeldetetinin aıtty.
Túrkııalyq basylym bul jazbasynda ary qaraı «Túrik tili ıslamnan keıin de óz bolmysyn saqtady», «Órkenıet jazýdan bastalady: ataý qateliginen bas tartý qajet» jáne «160 mıllıondyq táýelsiz kúsh jáne mádenı sananyń mańyzy» degen taqyryptar boıynsha toqtalǵan.