Ulttyq kitaphana jańa sırek qoljazbamen tolyqty
ASTANA. KAZINFORM — Ulttyq kitaphananyń qoryna qoǵam qaıratkeri, mádenı mura janashyry Aqan Tańjaryqulynyń jeke jınaǵynda saqtalǵan asa qundy qoljazbalar resmı túrde tapsyryldy. Bul týraly Mádenıet jáne aqparat mınıstrliginiń baspasóz qyzmeti habarlady.
Qoljazbalardy qabyldaý rásimi Qazaqstan qoljazbatanýshylar qaýymdastyǵynyń II otyrysy aıasynda ótti. Jıynǵa elimizdiń belgili qoljazbataný jáne shyǵystaný salasynyń ǵalymdary, kitaphana qyzmetkerleri men jas zertteýshiler qatysty.
Іs-sharanyń negizgi maqsaty – Qazaqstandaǵy qoljazba muralardy júıeli túrde zerttep, saqtaý jáne ǵylymı aınalymǵa engizý. Jıynda zertteýlerdiń ádistemelik jáne quqyqtyq negizderi talqylanyp, qoljazbataný ǵylymynyń qazirgi damý úrdisteri aıqyndaldy. Sondaı-aq, otandyq jáne halyqaralyq ǵylymı qaýymdastyq arasyndaǵy kásibı baılanysty nyǵaıtý máseleleri kóterildi.
Otyrys barysynda qatysýshylar «Qazaqstandaǵy memlekettik jáne jeke qoljazba qorlary: ǵylymı-praktıkalyq mańyzy, zańnamalyq, quqyqtyq máseleleri» taqyrybynda baıandama jasap, qoljazbalardy saqtaý men paıdalaný kezinde týyndaıtyn ózekti máselelerdi atap ótti. Sonymen qatar ǵylymı jáne quqyqtyq turǵyda sheshýdi qajet etetin jaıttar da kóterildi.
Sonymen qatar ál-Farabı atyndaǵy Qazaq ulttyq ýnıversıteti janyndaǵy «Jazba jádiger jáne rýhanı mura» ǵylymı-zertteý ortalyǵynyń bastamasymen jaryq kórgen Sultan Álı Tabıb ál-Horasanıdiń «Emshilik dástúri» atty eńbeginiń tanystyrylymy ótti.
Aıta ketelik Batys Qazaqstanda kóne kitap, qoljazbalardy jınaý qolǵa alynǵan edi.