Ulttyq kitaphana Muhtar Áýezov kabıneti jabyldy degen aqparatty joqqa shyǵardy
ALMATY. KAZINFORM — Qazaqstan Respýblıkasy Ulttyq kitaphanasy áleýmettik jeliler men BAQ-ta taraǵan «Muhtar Áýezovtiń ǵylymı kabıneti jabyldy» degen aqparatty resmı túrde joqqa shyǵardy.
Mekemeniń habarlaýynsha, 2014 jyly Ulttyq kitaphana men jazýshynyń otbasy músheleriniń bastamasymen ashylǵan Muhtar Áýezovtiń ǵylymı kabıneti qazir óz jumysyn jalǵastyryp keledi.
— Kabınettiń maqsaty — jazýshynyń baı shyǵarmashylyǵyn zerdeleý jáne ádebı murasyn nasıhattaý. Kabınette Muhtar Áýezovtiń kitaptary men onyń shyǵarmashylyǵyna arnalǵan ádebıetter jınaqtalǵan, — delingen Ulttyq kitaphana málimdemesinde.
2025 jylǵy qyrkúıekte Muhtar Áýezovtiń nemeresiniń bastamasymen qala ákimdigi Muhtar Áýezov atyndaǵy kitaphanany qurý týraly sheshim qabyldady. Mádenıet basqarmasynyń basshylyǵymen jáne qala ákiminiń orynbasarymen kelisim boıynsha jazýshynyń esimi «Almaty qalasynyń ortalyqtandyrylǵan kitaphana júıesi» KMQK-niń № 4 kitaphana-fılıalyna berildi.
— Muhtar Áýezovtiń atyndaǵy kitaphananyń ashylýy aldynda Ulttyq kitaphanadaǵy jazýshynyń ǵylymı kabınetindegi ýaqytsha saqtaýǵa tapsyrylǵan jeke zattary men kitaptary osy kitaphanaǵa tapsyryldy, — delingen habarlamada.
Ulttyq kitaphana qazirgi tańda Muhtar Áýezovtiń ǵylymı-zertteý kabıneti ekskýrsııalyq baǵytqa engizilgenin jáne ol qalypty rejımde jumys istep turǵanyn málimdedi.
Eske salaıyq, buǵan deıin Almatyda Muhtar Áýezov atyndaǵy kitaphana ashylǵanyn jazǵanbyz.
Saltanatty rásim kezinde Murat Áýezovtiń jeke muraǵatynan alynǵan kitaptar Almaty qalasynyń ortalyqtandyrylǵan kitaphana júıesine tapsyryldy. Sondaı-aq Álkeı Marǵulannyń buryn jarııalanbaǵan «Muhtar Áýezov týraly estelikter» atty kitabynyń tusaýkeseri ótti.