Ulttyq kitap kúnine arnalǵan is-sharalar aptalyǵy bastaldy

ASTANA. KAZINFORM – Ulttyq kitap kúni aıasynda ótetin is-sharalar aptalyǵy bastaldy. QR Mádenıet jáne aqparat mınıstrliginiń qoldaýymen QR Ulttyq akademııalyq kitaphanasynda «Ult jáne ulttyq kitap» atty ashyq esik kúni ótti. Bul týraly vedomstvonyń baspasóz qyzmeti málim etti.

– Іs-sharanyń maqsaty – qalamger, kitap jáne oqyrman arasyndaǵy baılanysty nyǵaıtyp, mádenı-rýhanı qundylyqtardy qoǵamǵa jan-jaqty nasıhattaý, ıntellektýaldy jastardy yntalandyrý, – delingen habarlamada.

Ashyq esik kúni aıasynda kitaphanadaǵy jańartylǵan kovorkıng ortalyǵynyń saltanatty ashylýy ótti. Zamanaýı formattaǵy bul keńistik oqyrmandardyń birlesip jumys isteýine, pikir almasýyna, bilimin jetildirýine múmkindik beredi.

Sondaı-aq «Kitap – ulttyq qundylyq» atty dóńgelek ústel uıymdastyrylyp, otandyq ádebıetti qoldaýǵa baǵyttalǵan táýelsiz joba — Mecenat.kz ádebı syılyǵy tanystyryldy. Dóńgelek ústelde Estonııa Elshisi ıAap Ora, aqyn-dramatýrg Baıanǵalı Álimjanov, professor Ásıma Ishanova, jazýshy Nartaı Saýdanbekuly, synshy Amangeldi Keńshilikuly jáne basqa da zııaly qaýym ókilderi sóz sóılep, ádebı shyǵarmalar arqyly ulttyq ádebıetke qoldaý kórsetýdiń mańyzyn atap ótti.

Sonymen qatar is-shara aıasynda QR Memlekettik syılyǵynyń laýreaty Roza Muqanovanyń «Kitap – aqyl nury» atty sheberlik sabaǵy, «Aınadan/Zazerkale» sýret kórmesi jáne mektep oqýshylaryna arnalǵan «Ozyq oı alańy» atty book quiz uıymdastyrylyp, jýrnalıst Mánshúk Shymyrbaıdyń «Dana. The World Citizen» derekti fılmi kórsetildi.

«Ulttyq kitap» kúnine oraı elimizdiń barlyq óńirinde ashyq esik kúnderi, kitap festıvalderi, kórme-jármeńkeler, baspagerler jáne kitap dúkenderimen birlesken jobalar uıymdastyryldy. Bul aktsııalarǵa respýblıka boıynsha 25 000 jýyq adam qatysty.