Ulttyq kitap kúni Jetisýda chellendj, býkkrossıng, saıahat sabaǵy, defıle ótip jatyr
TALDYQORǴAN. KAZINFORM – Jetisý oblysynda Ulttyq kitap kúni merekesine oraı túrli formatta is-sharalar ótkizilip jatyr. Sonyń ishinde chellendjder, býkkrossıng aktsııasy, kompozıtsııa keshteri, konferentsııa, saıahat sabaǵy, kezdesýler, kitap kórmeleri men jármeńkeler jáne basqalaryn atap ótýge bolady, dep habarlaıdy oblys ákiminiń baspasóz qyzmeti.
- Ulttyq kitap kúni Memleket basshysynyń bastamasymen 2024 jyldan beri atalyp ótedi. Oblysta jalpy sany 150 kitaphana bolsa, kitap kúnine arnalǵan is-sharalar solardyń barlyǵynda belsendi ótkizilip jatyr. Biz tek basqosýlarmen shektelmeı, qazirgi zamanǵy jańa formattardy da keńinen qoldanamyz. Bul rette ásirese jastardyń qyzyǵýshylyǵy úlken ekeni baıqalady, oǵan biz qýanamyz. Jastardyń kitapqa degen súıispenshiligin oıatý arqyly olardy mádenı-rýhanı, aǵartýshylyq-tanymdyq turǵyda damytýǵa, oı kókjıegin keńeıtýge yqpal etýge bolady, - dedi oblystyq Mádenıet, arhıvter jáne qujattama basqarmasynyń basshysy Qýanysh Súleımenov.
Máselen, Sáken Seıfýllın atyndaǵy ortalyq kitaphana «Kitap jáne pikir alańy» atty talqylaý keshin, «Ólke avtorlary – álem tilinde» atty ádebı podkast, «Kim tapqyr?» zııatkerlik oıynyn uıymdastyrsa, Kóksý aýdandyq kitaphanasynda «Búgingi trend – kitap oqý» kitap kórmesi, «Tapqyr bolsań, taýyp kór» vıktorınalyq oıyny, «Jańa kitaptar» defılesi, «Ǵasyrlar tartysy: kitap pen smartfon» atty sahnalyq kórinis usynyldy.
Munda qazaq jáne shetel ádebıeti klassıkteriniń shyǵarmalaryndaǵy keıipkerler, kitapqa qatysty basqa da saýaldar qoıylyp, qatysýshylar ózara pikir almasty. Jańa kitaptar men sırek kezdesetin kitaptardyń danalary tanystyrylyp, kórsetildi, kitap pen zamanaýı gadjetterdiń artyqshylyǵy men kemshiligi talqylandy.
Atalǵan is-sharalarǵa jergilikti mektep oqýshylary, kitaphana oqyrmandary, qalamgerler, jalpy kitapsúıer qaýym qatysty.
- «Kitap jáne pikir alańy» keshi óte mazmundy ári qyzyqty ótti. Kitapqa baılanysty sózderdiń oryndary aýystyrylyp jazylǵan áripterden durys sóz qurastyryp jarystyq, jasyrǵan san túrli keıipkerlerdi taptyq, óz oıymyzdy erkin jetkizip, kitapqa qatysty túrli kózqarastarmen tanystyq. Men Seıfýllın atyndaǵy kitaphanaǵa turaqty kelemin. Osyndaı qyzyqty keshterden keıin kitap oqýǵa degen qyzyǵýshylyǵymyz arta tústi, - deıdi jas oqyrman, Taldyqorǵan qalasyndaǵy № 15 mekteptiń 7-synyp oqýshysy Aıajan Sábıtqyzy.
Osy sharalarǵa belsendi qatysyp júrgen «Mızam» jyljymaly ádebı mekteptiń ókilderi de pikir bildirdi.
- Biz qurǵan «Mızam» mektebi kitap oqytýdyń túrli ádisterin barynsha qamtyp, osyndaı is-sharalardyń basy-qasynan únemi tabylady. «Mızam» mektebi – jaı ǵana ádebı orta emes, ol – kitap arqyly tulǵa qalyptastyratyn rýhanı alań. Bizdiń maqsatymyz - oqýdy mindet emes, ómir saltyna aınaldyrý. Kitap oqý – tek mátindi túsiný ǵana emes, keıipkermen birge oı keshý, avtordyń álemine ený, óz bolmysyńdy taný. Osyndaı tásildiń arqasynda oqýshylardyń sózdik qory baıyp, oılaý qabileti tereńdep, rýhanı kókjıegi keńeıedi, - deıdi «Mızam» ádebı jyljymaly mektebiniń dáriskeri, aqyn Muhtar Kúmisbek.
Ulttyq kitap kúniniń mańyzyn arttyrý, sol arqyly qoǵamda kitap oqý mádenıetin qalyptastyrý maqsatynda qolǵa alynǵan mundaı is-sharalar barlyq aýdan-qalany qamtydy.
