Ulttyq kitap kúni: Ulytaýda kitaphanashylar merekesi atap ótildi
JEZQAZǴAN. KAZINFORM — 23 sáýir – Kitaphanashylar men Ulttyq kitap kúnine oraı Ulytaý oblystyq ámbebap kitaphanasynyń májilis zalynda «Kitaphanashy – mereıli mamandyq» atty merekelik kesh ótti.
Іs-shara aıasynda kitap aptalyǵy barysynda uıymdastyrylǵan «Oqy, ós, ózger», «Sırek kitaptar – ult qazynasy», «Dárıdaılap jyr tókken» (Muqanbetqalı Seıitqazınovtyń 70 jyldyǵyna arnalǵan), «Ónerdiń óreli joly» (Serik Ospan shyǵarmashylyǵyna arnalǵan), «Tuǵyry bıik tulǵa» (Sútemgen Búkirovtyń 105 jyldyǵyna arnalǵan) kitap kórmeleri, sondaı-aq «Ár kitap – bir jańa múmkindik» fotozonasy kópshilik nazaryna usynyldy.
Kesh Qazaqstan Respýblıkasynyń Ulttyq kitaphanasynyń dırektory Ǵazıza Qudaıbergenniń «Kitaphanashy kúndeligi» kitaby negizinde daıyndalǵan kórkem kompozıtsııalyq qoıylymmen ashylyp, kitaptyń qundylyǵy men kitaphanashy mamandyǵynyń mańyzy keńinen nasıhattaldy.
Saltanatty bólimde Ulytaý oblysy ákiminiń orynbasary Zına Jumanazarqyzy Aqylbekova quttyqtaý sóz sóılep, sala mamandarynyń qoǵamdaǵy róline toqtaldy.
Mereke aıasynda kitaphana qyzmetkerlerin marapattaý rásimi ótti. Qazaqstan Kitaphanalar odaǵynyń «Qazaqstannyń Qurmetti kitaphanashysy» tósbelgisi Ulytaý oblystyq ámbebap kitaphanasy basshysynyń orynbasary J. Týkenovaǵa tabystaldy. Sondaı-aq salalyq kásiptik odaqtyń tósbelgileri Jańaarqa aýdany Baıda bı aýylynyń kitaphanashysy S. Kenshımova men kitaphanashy B. Shegebaevaǵa berildi.
Budan bólek, birqatar mamandar Qazaqstan Respýblıkasynyń Ulttyq kitaphanasynyń Alǵys hatymen, Ulytaý oblysynyń Qurmet gramotasymen jáne Alǵys hattarymen, sondaı-aq mádenıet, tilderdi damytý jáne arhıv isi basqarmasynyń marapattarymen nagradtaldy.
Shara barysynda «Kitap kúni – kitap syıla» chellendji uıymdastyrylyp, qatysýshylar bir-birine kitap tartý etti. Sonymen qatar sala ardagerlerine qurmet kórsetildi.
Kesh sońy kontserttik baǵdarlamaǵa ulasyp, Taıjan Qalmaǵanbetov atyndaǵy Ulytaý oblystyq fılarmonııasynyń ónerpazdary men oblys kitaphanalarynyń shyǵarmashylyq ujymdary kórermenge erekshe kóńil-kúı syılady.