Ulttyq kitap kúni: 500 metrlik gúlzar alańynda aqtóbelikter kitap álemine saıahattady
AQTÓBE. KAZINFORM — 23 sáýir - Ulttyq kitap kúninde jáne uly aqyn Abaıdyń 180 jyldyǵy qarsańynda Aqtóbede erekshe shara ótti.
Abaı dańǵyly boıyndaǵy 500 metrlik gúlzar alańy ádebıet pen ónerdiń, tehnologııa men rýhanııattyń toǵysqan alańyna aınaldy. Alǵash ret ótken «Kitap álemi» atty book tourism formatyndaǵy merekelik shara qala jurtshylyǵyn shynaıy ádebı saparǵa jeteledi.
Rýhanı-tanymdyq shara «Kitappen dos bolamyz» atty jarqyn fleshmobpen ashyldy. Qatysýshylar arasynda mektep oqýshylary, kitaphana qyzmetkerleri jáne jas ónerpazdar bar. Alańda ornatylǵan LED ekrannan kitap týraly beınerolıkter kórsetilip, jınalǵan qaýymǵa aıyryqsha áser qaldyrdy.
Saltanatty ashylý sátinde oblys ákimi Ashat Shaharov, óńirimizdiń tanymal aqyn-jazýshylary, qoǵam qaıratkerleri sóz sóılep, kitaptyń adam ómirindegi mańyzyna mán berdi.
«Búgin elimizde Ulttyq kitap kúni atalyp ótýde. Ózderińizge málim, bul kún Memleket basshysynyń oqý mádenıetin damytý jónindegi bastamasy jáne úshinshi Ulttyq quryltaıdyń negizgi sessııasynda aıtylǵan úndeý negizinde resmı túrde bekitildi. Oblys kóleminde kitaphana isin jańǵyrtý, tsıfrlyq resýrstardy damytý, jas oqyrmandardyń qyzyǵýshylyǵyn arttyrý baǵytynda júıeli jumystar júrgizilip keledi. Búgingi kúni oblys kitaphanalarynyń jalpy kitap qory – 3 506 381 danany quraıdy. 2024 jyly kitaphana qyzmetin 297 837 adam paıdalandy. Sonymen qatar, bıylǵy jyly kitap qory 64 353 jańa basylymmen tolyqty. Biz kitaphanalardy jańǵyrtý, tsıfrlandyrý baǵytyndaǵy jumystardy da jalǵastyramyz», - dep atap ótti Ashat Shaharov.
Mádenı sharanyń basty erekshelikteriniń biri – ádebı shyǵarmalardyń keıipkerleriniń «tirilýinde». T.Ahtanov teatrynyń ártisteri Muqaǵalı Maqataev, Farıza Ońǵarsynova, Qadyr Myrza Álı men Qýandyq Shańǵytbaevtyń beınelerin somdap, óleńderin naqyshyna keltire oryndady. Pýshkın men Lermontov beınesi de bul sharadan tabyldy. Balalar men jasóspirimder, jastar, úlkender ádebıet alyptarymen estelik sýretke tústi.
Sondaı-aq, kópshilik nazaryna usynylǵan ádebı mıýzıkl – «Sezim men syrdyń aqyny – Muqaǵalı Maqataev» qoıylymy kórermenniń ystyq yqylasyna bólendi. Aqtóbe joǵary gýmanıtarlyq kolledji aqynnyń tereń oıly jyrlary men júrek tebirenter sazdy áýenderin úılestire otyryp, sahnada shynaıy rýhanı kórinisti pash etti.
«Alaqaı» qýyrshaq teatry, S.Jıenbaev atyndaǵy oblystyq jasóspirimder kitaphanasy, Ahash Media Studio oqýshylary ázirlegen ádebı montajdar, «Aqtóbe – óleń ólkesi» atty poetıkalyq kompozıtsııalar ádebıettiń san qyryn asha bildi.
«Búgingi shara bizge kitap tek paraq emes, ol – ómirdiń ózi ekenin eske saldy. Nemeremmen birge keldim. Oǵan bári qyzyq, tipti robottar men ertegiler kórmesine kirip, kitap oqýǵa degen qushtarlyǵy oıanǵandaı boldy», – deıdi zeınetker Sara apaı.
Sharanyń taǵy bir ereksheligi – úsh baǵyttaǵy kórmeniń uıymdastyrylýynda. «Abaı murasy» kórmesinde uly aqynnyń eńbekteri men ulttyq ádebı muralar tanystyryldy. «Internet kafe» bóliminde zamanaýı tehnologııalar men robototehnıka buryshy jasaqtalyp, balalar jańa bilim álemine úńildi. Al «Ertegiler elinde» keńistigi kishkentaılarǵa arnalǵan ádebı-tanymdyq álemge aınaldy.
Árbir kórmeni óńir basshysy jiti qarap shyqty. Oqýshylardyń jatqa oqyǵan óleń joldaryn tyńdap, ónerlerin tamashalap, olarmen kitap týraly áńgimelesti. Birneshe kishkentaı aqtóbelikke arnaıylap sol jerdegi kitap dúkenderinen kitap satyp alyp berip, úlestirdi.
Búgingi sharany ótkizýdegi basty maqsat – kitap oqýdy nasıhattaý, jastar men balalardyń ádebıetke qyzyǵýshylyǵyn arttyrý, ulttyq rýhanı qundylyqtardy dáripteý.
Shara uıymdastyrýshylary ár senbiniń keshinde saǵat 18:00-20:00 aralyǵynda qala turǵyndary úshin 5 alańda (Abaı dańǵylyndaǵy gúlzar, N.Baıǵanın kitaphanasy ornalasqan alań, Ádebıet alańy, Trıatlon jáne Astana saıabaqtary) jyljymaly kitap kórmesi uıymdastyrylmaq.
Aıta keteıik, Elimizdegi oqyrmany eń kóp 100 kitap anyqtalatyn boldy.