Ulttyq kózqarasymyzdy dáripteýimiz qajet – Qasym-Jomart Toqaev
Memleket basshysy Qasym-Jomart Toqaev Qyzylorda qalasynda jaqynda boı kótergen «Anaǵa taǵzym» ortalyǵyn aralap kórdi, dep habarlaıdy Kazinform.
Aqorda málimetine súıensek, atalǵan ortalyq bıyl demeýshilerdiń qoldaýymen salynǵan. Jalpy quny – 1 mıllıard 700 mıllıon teńge.
Jobanyń maqsaty – ulttyq qundylyqtardy urpaqqa mıras etip qaldyrý, dástúrli mádenıetti jańǵyrtý, áıelder eńbegin dáripteý. Sonymen qatar qyz-kelinshekter men analardy ómirge, turmysqa beıimdeý jumysymen de aınalysady.
Prezıdent ortalyqta qolóner sheberleri jasaǵan buıymdar kórmesin jáne «Qazaq eliniń uly analary» kartınasyn tamashalady. Sodan keıin «Anaǵa taǵzym» ortalyǵyndaǵy «Ult jaquty» mýzeı zalymen, «Mıras» ájeler klýbymen, «Jas otaý» mektebimen, «Shamshyraq» foto-vıdeo stýdııasymen, psıholog-medıator kabınetimen tanysty.
Memleket basshysy mundaı ortalyq jastarǵa tálim-tárbıe berýde mańyzdy ról atqaratynyn aıtty.
«Rasynda, bul jumys óte mańyzdy. Jastarymyzdyń arasynda ulttyq salt-dástúrimizdi, bolmysymyzdy, tilimizdi, dilimizdi nasıhattaýymyz kerek. Áıtpese, dúnıejúzinde bolyp jatqan teris úrdisterdi bárimiz kórip otyrmyz. Ondaı jaǵymsyz úrdister elimizde de bar. Biz olarmen kúresip, ózimizdiń ulttyq kózqarasymyzdy dáripteýimiz qajet», – dedi Qasym-Jomart Toqaev.
Eske salaıyq, búgin tańerteń Memleket basshysy Qyzylorda oblysyna jumys saparymen bardy.
Qasym-Jomart Toqaevtyń óńirge sapary Syrdarııa aýdany Naǵı Іlııasov aýylynyń tynys-tirshiligimen tanysýdan bastaldy.
Odan ári Prezıdent byltyr boı kótergen «Eńbek alleıasynda» eńbek adamdarymen júzdesti.
Sondaı-aq «Qorqyt ata» áýejaıynyń jańa termınalymen, «Qyzylorda – Jezqazǵan» avtojolynyń qurylys barysymen tanysty.
Budan bólek, Memleket basshysy «Altyn orda» kúrish zaýytyna, Temirbeton buıymdary zaýytyna bardy. Qyzylorda qalasynyń jańa jylý elektr ortalyǵynyń qurylysymen tanysý kezinde jobany ýaqytyly aıaqtaýdy tapsyrdy.
