Ulttyq qorǵanys ýnıversıtetiniń 217 túlegine magıstr dárejesi berildi
ASTANA. KAZINFORM - Qazaqstan Respýblıkasynyń Ulttyq qorǵanys ýnıversıtetinde jedel-taktıkalyq jáne jedel-strategııalyq basqarý deńgeıleri mamandarynyń oqýdy aıaqtaýyna baılanysty saltanatty shara ótti.
Іs-sharaǵa Qorǵanys mınıstrliginiń basshylyq quramy, oqytýshylar, magıstranttar, áskerı qyzmetshilerdiń týystary men jaqyndary qatysty.
QR Qorǵanys mınıstriniń birinshi orynbasary - Qarýly kúshterdiń Bas shtab bastyǵy general-leıtenant Sultan Kamaletdınov áskerı basshylardyń jańa býynyn quttyqtaı otyryp, bul oqıǵanyń eldiń Qarýly kúshteri men qorǵanys qabiletin nyǵaıtýdaǵy mańyzdylyǵyn atap ótti.
Ol joǵary bilikti áskerı kadr daıarlaý júıesin jetildirýge eleýli úles qosatyn professorlyq-oqytýshylar quramyna, sondaı-aq áskerı qyzmetshilerdiń otbasy múshelerine moraldyq qoldaý kórsetkeni úshin alǵysyn bildirdi. Ol jańa zamanǵa sátti beıimdelýge múmkindik beretin ózekti bilimniń mańyzdylyǵyn atap ótti.
- Qarýly kúshterdi bolyp jatqan ózgeristerge beıimdeý, basqarý júıesin jańǵyrtý jáne Ulttyq qorǵanys ýnıversıtetinde jańa tehnologııalardy engizý boıynsha Joǵarǵy Bas qolbasshy qoıǵan mindetterdi eskere otyryp, áskerlerdiń qajettilikterine sáıkes bilim berý baǵdarlamalary únemi jetildirilip otyrady. Ýnıversıtette áskerı qurylystyń, eldiń qorǵanys qabiletin jáne ulttyq qaýipsizdigin qamtamasyz etýdiń ózekti máseleleriniń keń spektri boıynsha aýqymdy ǵylymı-zertteý jumystary júrgizilýde, - dep atap ótti ol.
UQShU elderi Qarýly kúshteriniń túlekterine arnaǵan sózinde general-leıtenant Sultan Kamaletdınov alǵan bilimderi olarǵa ózderiniń qarýly kúshteriniń mindetterin laıyqty sheshýge jáne bizdiń dostas memleketterimizdiń áskerı qaýipsizdigin nyǵaıtý isine úles qosýǵa múmkindik beretinine senim bildirdi.
- Ýnıversıtet basshylyǵyna, professorlyq-oqytýshylyq quramǵa bizge is júzinde paıdaly bolatyn irgeli, ári mamandandyrylǵan bilim úshin alǵys bildiremiz. Barlyq magıstranttarǵa olardy qyzmette tabysty qoldanýyn tileımin, - dep bólisti «Qarýly kúshter Bas shtabynyń akademııasy» fakýltetiniń túlegi polkovnık Aıbol Júsipov.
Bıyl memlekettik attestattaý komıssııasynyń sheshimimen 217 túlekke magıstr dárejesi berildi. Onyń ishinde Ulttyq ulannyń 19, UQK Shekara qyzmetiniń 12, Tótenshe jaǵdaılar mınıstrliginiń 6 áskerı qyzmetshisi bar.
Sonymen birge Qyrǵyzstan Qarýly kúshteriniń 5 jáne Tájikstan Qarýly Kúshteriniń 11 ókili oqýdy aıaqtap shyqty. Memlekettik attestattaý komıssııasynyń sheshimi boıynsha olarǵa ulttyq qaýipsizdik jáne áskerı ister magıstri dárejesi berildi. Oqýdyń barlyq kezeńinde emtıhandardy jáne qorytyndy attestattaýdy «óte jaqsy» baǵasyna tapsyrǵan magıstranttarǵa tósbelgi berildi. Olardyń aty-jóni oqý ornynyń Qurmet taqtasyna engiziledi.
Osyǵan deıin áskerı oqý oryndarynyń 14 túlegi Qasym-Jomart Toqaevtyń qolynan ofıtserlik shen alǵany týraly jadyq.