Ulttyq qorǵanys ýnıversıtetinde polıglot sarbaz qyzmet etedi
ASTANA. KAZINFORM — Qatardaǵy jaýynger Mádı Qaısarulyn áriptesteri «polıglot» dep ataıdy. Onyń sebebi 24 jastaǵy áskerı qyzmetshi tórt túrli tildik topqa jatatyn bes tildi erkin meńgergen, dep habarlaıdy Qorǵanys mınıstrliginiń baspasóz qyzmeti.
Ulttyq qorǵanys ýnıversıteti áskerı-ǵylymı vzvodynyń ınjenerlik-tehnıkalyq bólimshesiniń qatardaǵy jaýyngeri Mádı Qaısaruly túrik, slavıan, german jáne roman tildik toptaryna jatatyn bes tilde sóıleıdi. Bul erekshe qabilet oǵan ártúrli ortada erkin qarym-qatynas jasaýǵa jáne ózgeshe mádenıetterdi tereń zertteýge múmkindik beredi.
24 jasyna deıin Mádı 20 eldi aralaǵan. Óz sózinshe, til meńgerýde motıvatsııa, júıeli tájirıbe jáne halyqtyń mádenıetine qyzyǵýshylyq óte mańyzdy.
— Tildi ıgerý úshin júıeni túsiný, erejeler men zańdylyqtardy ajyrata bilý kerek. Sol arqyly bóten dybystar men tanys emes sózderden sóılem qurýǵa bolady. Adamnyń qalaýy aldynan esik ashady, tabandylyq zerttelmegen álemge jeteleıdi, al júıe adaspaýǵa kómektesedi, — deıdi Mádı.
Mádı eki tildi ortada tárbıelengen. Ol ana tilin jáne orys tilin erkin meńgergen. Al shet tili retinde aldymen aǵylshyn tilin ıgergen, keıin lıtseıde túrik tilin oqyp, Ispanııada bilim alǵan kezinde ıspan tilin meńgergen.
Sarbaz óz jetistigimen toqtap qalýdy oılamaıdy. Ol taǵy úsh-tórt tilde erkin sóılegisi keledi, sebebi til bilý adamǵa búkil álemdi ashady.
Moıynqum aýdany, Jambyl oblysynyń týmasy Mádı jańa tildi meńgergende sol halyqtyń mádenıeti men mentalıtetin tereń túsinýge umtylady. Ol birneshe til bilý kognıtıvtik qabiletterdi damytyp, jadyny, nazardy, oılaý men sóıleýdi jetildiretinine senimdi. Bul hobbı oǵan áskerı oqý-jattyǵýlarda ártúrli tapsyrmalardy jyldam oryndaýǵa múmkindik beredi.
Budan buryn eń boıshań sarbaz teńiz jaıaý áskerlerinde qyzmet etetinin jazǵanbyz.